Bakı. Trend:
BMT-in Ərzaq və Kənd Təsərrüfatı Təşkilatının Azərbaycandakı Tərəfdaşlıq və Əlaqələndirmə Ofisi (FAO) ADA Universiteti ilə əməkdaşlıq çərçivəsində, Kənd təsərrüfatı və Qida Elmi fakültəsinin açılışını və Ümumdünya Qida Gününü qeyd edib.
Trend xəbər verir ki, bu gün keçirilən tədbirdə nazirlik və dövlət qurumlarının nümayəndələri, universitetin tələbə-müəllim heyəti, beynəlxalq təşkilatların nümayəndələri və tədbir üçün qeydiyyatdan keçmiş şəxslər iştirak edib.
Tədbir çərçivəsində təşkil olunan sərgidə 10-a yaxın şirkətin məhsulları olmaqla, İtaliya-Azərbaycan Universiteti layihəsinin sertifikat proqramı iştirakçılarının təmsil etdiyi şirkətlərin, italyan markalarının, eləcə də, FAO-nun dəstəyi ilə ərsəyə gəlmiş “Yurdumun ləzzəti” brendinin qida məhsullarının dequstasiya və təqdimatı baş tutub.
Məhsulların təqdimatı qidanın sadəcə gündəlik tələbatdan savayı, kənd təsərrüfatı istehsalında çalışan hər kəsin qida təhlükəsizliyində rolu olduğunu və onların bir fərd kimi qida qəhrəmanları olmasının nümunəsidir. FAO – nun bu sahədə rolu məhz həmin qəhrəmanların gördüyü gündəlik kənd təsərrüfatı işlərinin daha səmərəli olması və qida təminatı və təhlükəsizliyində rolunun daha da artırılmasına yönəlib.
Tədbirdə ADA Universitetinin rektoru Hafiz Paşayev açılış nitqi ilə çıxış edərək bildirib ki, kənd təsərrüfatı ölkə iqtisadiyyatının ən vacib sahələrindəndir.
"Bu sahə yalnız qida məhsullarının istehsalından ibarət deyil. Kənd təsərrüfatı ölkənin qida təhlükəsizliyini təmin edir. Bu fakültəni təsis etməkdə məqsədimiz aqrar sahədə rəqabətədavamlı kadrlar yetişdirmək, elmi-texniki tərəqqi və innovasiya gətirə biləcək peşəkarlar hazırlamaqdır”, - deyə rektor çıxışına əlavə edib.
Kənd təsərrüfatı naziri Məcnun Məmmədov çıxışında vurğulayıb ki, Kənd Təsərrüfatı və Qida Elmi fakultəsinin yaradılması fərqli təcrübələrin tətbiqi və müqayisəli təhlillər üçün zəmin yaradacaq.
“Əminəm ki, yeni fakültənin açılışı ərzaq və qida təhlükəsizliyinin təmin edilməsi, su ehtiyatlarının səmərəli idarə edilməsi və kənd təsərrüfatının digər mühüm istiqamətləri üzrə təhlillərimizi daha da dərinləşdirməyə, müvafiq sahələr üzrə elmi-tədqiqat potensialımızın genişlənməsinə, səylərimizin effektivliyini daha da yüksəldərək qarşıya qoyulmuş hədəflərə nail olmağa müstəsna töhfəsini verəcək”, - deyə nazir Məcnun Məmmədov qeyd edib.
Qida Təhlükəsizliyi Agentliyinin sədr müavini Zəkiyyə Mustafayeva çıxışında bildirib ki, bu gün baş verən iqlim dəyişiklikləri, dəyişən istehlakçı vərdişləri, su ehtiyatlarının azalması, elmi-texniki yeniliklər, yeni qida mənbələri və istehsal prosesləri ərzaq və qida təhlükəsizliyinin təmin olunmasında qarşıda duran ciddi çağırışlardandır:
“Bu çağırışlara qarşı adekvat tədbirlərin görülməsi isə yalnız yüksək göstəricilərə sahib kadr potensialı ilə mümkündür”.
Z.Mustafayeva bu baxımdan, ADA Universitetində Kənd Təsərrüfatı və Qida Elmləri fakültəsinin yaradılmasını təqdirəlayiq hadisə adlandırıb. Agentlik sədrinin müavini bu addımı ölkəmizin kənd təsərrüfatı və qida sisteminə veriləcək misilsiz töhfə kimi qiymətləndirib və fakültənin işinin səmərəli qurulması məqsədilə tədris proqramlarının hazırlanması, qarşılıqlı bilik və təcrübə mübadiləsinin aparılması, tələbələrin elmi araşdırmalara və təcrübə proqramlarına cəlb edilməsi, elmi-tədqiqat işlərinin, müştərək layihə və tədbirlərin təşkili istiqamətlərində AQTA-nın ADA Universiteti ilə əməkdaşlığa hazır olduğunu qeyd edib.
FAO-nun Azərbaycandakı nümayəndəsi cənab Nasar Hayat çıxışı zamanı davamlı kənd təsərrüfatı, su və qida təhlükəsizliyinə təsir edən qlobal amillərdən bəhs edərək, gələcəyimizin qorunması üçün sudan düzgün istifadənin vacibliyini vurğulayıb.
Bundan savayı, BMT-nin 15 oktyabrda qeyd etdiyi Beynəlxalq Kənd Qadınları Gününü təbrik edərək, “Kənd qadınlarının resurslara və təhsilə ədalətli çıxışı olduqda, onlar dəyişikliklərin güclü agentlərinə çevrilirlər” deyə bildirib. Sonda bu əlamətdar gündə Ümumdünya Qida Gününü, Kənd Təsərrüfatı və Qida Elmi Fakültəsinin açılışını və Beynəlxalq Kənd Qadınları Gününü birgə qeyd olunması ilə bağlı hər kəsi təbrik edib. Çıxışın sonunda FAO – nun baş direktoru Dr. Qu Dong Yunun video müraciəti yayınlanıb.
İtaliyanın ölkəmizdəki səfiri Klaudio Taffurinin çıxışından və Bolonya Universitetinin rektoru Covanni Molarinin videomüraciətindən sonra Kənd təsərrüfatı və Qida Elmi fakültəsinin dekanı Matteo Vittuari fakültə barədə məlumat verib. Dekan çıxışında 2024-cü ildən etibarən tədris ediləcək bakalavr və magistr ixtisasları ilə bağlı bir sıra məsələlərə toxunub.
Müvafiq istiqamətdə fəaliyyət göstərən dövlət agentliyini, beynəlxalq təşkilatı və nazirliyi təmsil edən mütəxəssislər qida itkisini və tullantılarını ölçməyin mexanizmlərindən, təsirinin azaldılması üçün həyata keçirilən tədbirlərdən söhbət açıblar.
Tədbir seminarla davam edib.
Qeyd edək ki, 16 oktyabr FAO Ümumdünya Qida Gününü qeyd etmklə dünyanın diqqətini qida təhlükəsizliyinə, davamlı qida inkişafına yönəldir. 2023-cü il üçün mövzu “Su həyatdır, Su qidadır” şüarı altında qeyd olunur.
Əlavə olaraq qeyd edək ki, Kənd təsərrüfatı və Qida Elmi fakültəsi İtaliya-Azərbaycan Universitetinin təşəbbüsü çərçivəsində Bolonya Universiteti ilə əməkdaşlıq nəticəsində təsis edilib. Bu fakültə vasitəsilə həmin sahədə bakalavr, magistr və sertifikat proqramları təklif edilir.
2024-cü ildən açılacaq bakalavr və magistr ixtisasları ADA Universitetinin Bakı kampusunda, Qazax və Gəncədəki regional mərkəzlərində tədris olunacaq.
