Bakı. Trend:
Ötən il noyabr ayında Bakıda keçirilən BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasında (COP29) iştirak edən könüllülərə pul mükafatı ayrılıb.
Trend xəbər verir ki, bu barədə məlumat COP29 İşçi Qüvvəsi və Könüllülərlə İş komandası tərəfindən könüllülərə göndərilib.
"Sizin yaxından dəstəyinizlə COP29 tədbiri həm ölkəmizdə indiyə qədər olan, həm də COP tədbirləri çərçivəsində ən yüksək səviyyədə təşkil olunmuş konfrans kimi tarixə düşdü.
Qeyd etmək istərdik ki, ölkəmiz üçün önəmli olan bu tədbirdə könüllülərin fəaliyyəti fərqlənmiş və BMT-nin İqlim Dəyişmələri üzrə Çərçivə Konvensiyasının Katibliyi (UNFCCC), iştirak edən bütün ölkələrin nümayəndə heyətləri, eləcə də ölkə əhalisi tərəfindən rəğbətlə qarşılanıb.
İndiyə qədərki COP-larla müqayisədə həm say çoxluğuna, həm də saysız uğurlarına görə COP29 könüllülərinin fəaliyyəti ilə bağı hələ də müsbət rəylər almaqdayıq.
Tədbirimizin uğurla təşkil edilməsində Siz könüllülərin verdiyi töhfə təqdirəlayiq idi.
Bütün bunları nəzərə alaraq, Azərbaycan Respublikasının Prezidenti cənab İlham Əliyevin Sərəncamı ilə tədbirin uğurlu təşkil olunmasında İştirak edən hər bir könüllüyə Təşəkkürnamə və pul mükafatı ayrılıbş
Təşəkkürnamələrini 8-14 yanvar tarixində COP29-dan əldə edən könüllülər "Kapital Bank" ASC-nin istənilən filialına şəxsiyyət vəsiqəsi ilə yaxınlaşaraq mükafatlarını əldə edə biləcəklər", - məlumatda deyilir.