Bakı. Trend:
Hesabat dövründə imtiyazlı şəxslərə ümumilikdə 800 mənzil verilib.
Trend xəbər verir ki, bu barədə məlumat Milli Məclisin bu gün keçirilən plenar iclasında müzakirə edilən Nazirlər Kabinetinin 2024-cü ildə fəaliyyəti haqqında hesabatda öz əksini tapıb.
Hesabatda bildirilib ki, 2024-cü il ərzində növbədə olan imtiyazlı şəxslərdən 93 nəfər avtomobillə təmin olunub.
Sosial müdafiəyə daha çox ehtiyacı olan 2 134 nəfər əlilliyi olan şəxsə reabilitasiya və sosial-məişət problemlərinin həllinə köməklik məqsədilə birdəfəlik maddi yardım verilib.
Həmçinin 20 Yanvar faciəsinin 34-cü ildönümü ilə əlaqədar 75 nəfər 20 Yanvar şəhidinin ailəsi və 1990-cı ilin 20 Yanvar hadisələri ilə əlaqədar 243 nəfər əlilliyi olan şəxs olmaqla, ümumilikdə 318 nəfərə, Çernobıl AES-də qəzanın 38-ci ildönümü ilə əlaqədar sosial müdafiəyə daha çox ehtiyacı olan 500 nəfər əlilliyi olan şəxsə birdəfəlik pul yardımı verilib.
2024-cü ildə ölkəyə repatriasiya edilmiş Azərbaycan vətəndaşları olan 46 qadın və uşağa (40-ı Suriyadan, 2-si İraqdan, 4-ü Türkiyədən), ümumilikdə isə 190 ailədə 544 şəxsə sosial reabilitasiyası xidmətləri göstərilib.