Bakı. Trend:
Böyük Britaniyanın nüfuzlu ali təhsil ocaqlarından olan Oksford Universitetində “European-Eurasia Cultural Night” (“Avropa-Avrasiya Mədəniyyət Gecəsi”) adlı tədbir keçirilib. Tədbirdə “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı” çərçivəsində universitetdə İctimai Siyasət ixtisası üzrə magistr təhsili alan Şəbnəm Tağıyevanın təşəbbüsü və Diasporla İş üzrə Dövlət Komitəsinin dəstəyi ilə Azərbaycan stendi qurulub.
Trend xəbər verir ki, bu barədə Diasporla İş üzrə Dövlət Komitəsi məlumat yayıb.
Bildirilib ki, stenddə ölkəmizin qədim və zəngin mədəniyyəti, milli musiqisi, rəngarəng folkloru və dadlı mətbəx nümunələri təqdim edilib.
Milli təamlarımız və musiqilərimiz qonaqlarda böyük maraq doğurub. Bundan əlavə, interaktiv sual-cavablar təşkil olunub, iştirakçılar Azərbaycan haqqında biliklərini sınamaq fürsəti qazanıblar. Qaliblərə ölkəmizi əks etdirən simvolik hədiyyələr verilib.
Tədbir azərbaycanlı tələbələrə mədəni irsimizi geniş auditoriyaya tanıtmaq və ölkəmizi təmsil etmək imkanı yaradıb.
