...

Hərbçilərin ölümü ilə bağlı cinayət işləri təzələnəcək

Cəmiyyət Materials 9 Mart 2007 15:42 (UTC +04:00)

Trend-i buradan izləyin

Azərbaycan, Bakı / Trend müxbir K.Zərbalıyeva/ Ötən il noyabrın 4-də Naxçıvandakı N saylı hərbi hissənin zabiti Faiq Əliyevin ölümü ilə bağlı cinayət işinin istintaqı təzələnəcək. İşgəncələr Əleyhinə Komitənin eksperti Bayram Sadıqov bildirib ki, F.Əliyevin intihar etməsi əsası ilə aparılan istintaqın gəldiyi nəticə Ali Məhkəmədə hakim Oqtay Maqsudovun sədrliyi ilə aparılan məhkəmə prosesində ləğv olunub. Belə ki, ibtidai istintaq zamanı mərhumun xidməti silahı ilə başından vuraraq intihar etdiyi müəyyənləşdirilib. Lakin aparılan ekspertiza zamanı məlum olub ki, F. Əliyev başının arxasından odlu silahla 2 güllə yarası alıb. Sonradan cinayəti gizlətmək məqsədilə onun öz xidməti silahından alnından vurublar. Birinci instansiya məhkəməsi və Apellyasiya Məhkəməsi mərhumun intihar edərək öldüyü barədə qərar versə də, Ali Məhkəmə həmin qərarları ləğv edərək işi təkrar istintaqa göndərib.

N saylı hərbi hissənin əsgəri Tural Bayramovun da qətli ilə bağlı cinayət işi istintaqa qaytarılacaq. Onun xidmət etdiyi hərbi hissənin giziri Şakir Rüstəmov tərəfindən qətlə yetirildiyi məhkəmə prosesi ilə müəyyən olunub. B. Sadıqov bildirib ki, T.Bayramovun da ölümü intihar hadisəsi kimi qələmə verilib. Gizir Ş. Rüstəmova isə Cinayət Məcəlləsinin 125-ci (özünü öldürmə həddinə çatdırma) maddəsi ilə ittiham elan olunub. Lakin Apellyasiya Məhkəməsində hakim Rasim İsgəndərovun sədrliyi ilə keçirilən prosesdə əsgərin Ş. Rüstəmov tərəfindən öldürülməsi ilə bağlı kifayət qədər sübut olduğu üçün onun barəsində Cinayət Məcəlləsinin 125-ci maddəsi ilə cinayət işinə xitam verilməsi qərara alınıb.

Xəbər lenti

Xəbər lenti