Azərbaycan, Bakı / Trend müxbir İ.Əlizadə/ Əfv olunması mümkün sayılan şəxslərin siyahısına 100-dən artıq məhbusun adı daxil edilib. Prezident yanında Əfv Komissiyasının üzvü, millət vəkili Elmira Axundova bildirib ki, bu, son rəqəm deyil və komissiya yaxın bir-iki həftə ərznidə işini yekunlaşdırıb siyahını prezident İlham Əliyevə təqdim edəcək.
O qeyd edib ki, əfv fərmanları adətən Azərbaycan üçün əlamətdar günlər ərəfəsində imzalanır: "İndi isə qarşıdan Novruz bayramı gəlir. Komissiyanın vəzifəsi daxil olan müraciətlərə baxmaq və siyahını dövlət başçısına təqdim etməkdir. Amma əfv fərmanını imzalamaq prezidentin səlahiyyətinə aid olan məsələdir. Ona görə də əfv fərmanının nə vaxt imzalanacağını deyə bilmərəm."
Bəzi hüquq müdafiəçilərinin siyasi məhbus kimi təqdim etdikləri şəxslərin adının əfv olunması mümkün sayılan şəxslərin siyahısına daxil edilib-edilmədiyinə gəlincə, millət vəkili konkret ad çəkməyib. "Ona görə ki, bəzən əfv siyahısına hansısa məhbusların adı daxil edildiyinə dair açıqlama verilir. Sonra həmin şəxslər əfvə düşməyəndə narazılıq yaranır. Ona görə də siyahıda kimlərin adının olduğunu açıqlaya bilmərəm", -deyə Elmira Axundova bildirib.
Millət vəkili vurğulayıb ki, son dövrlər əfv komissiyasının iclasları mütadadi keçirilir.
