Bakı. Trend:
"Kapital Bank" məlumatların transformasiyası üçün mərkəzləşdirilmiş struktur yaradıb.
Trend xəbər verir ki, bu barədə “Kapital Bank”ın analitika şöbəsinin rəhbəri Seymur Şabanlı Bakıda "PAŞA Holding" tərəfindən 4-cü dəfə təşkil edilən "INMerge” İnnovasiya Sammitində deyib.
Onun sözlərinə görə, məlumatların transformasiyası prosesi davamlıdır və məlumatlarla işlərin aparılması üzrə tam hazır vəziyyətə birdəfəlik çatmaq mümkün deyil.
"Təşkilatlar məlumatlarla işləmə sahəsində mövcud yetkinlik səviyyələrini qiymətləndirməli və hansı mərhələdə olduqlarını, hara getmək istədiklərini müəyyənləşdirməlidirlər. “Excel”dən birbaşa süni intellektə və ya generativ süni intellektə keçmək mümkün deyil", - o bildirib.
S.Şabanlı qeyd edib ki, məlumatların transformasiyası təkamül prosesidir.
"Təşkilatın nə qədər böyük olduğunu və məlumatlarla işləmə səviyyəsini nəzərə almaq lazımdır. “Kapital Bank” olaraq biz orta səviyyədə idik: müəyyən nailiyyətlərimiz var idi, lakin daha çox inkişaf lazım idi. Buna görə də bank "Mükəmməllik Mərkəzi" adlanan mərkəzləşdirilmiş struktur yaratdı və oraya mütəxəssislər cəlb etdi", — o əlavə edib.
Seymur Şabanlı məlumatların transformasiyasının 3 əsas sütununu qeyd edib: mədəniyyət, təşkilat və texnologiyalar.
"Biz yeni təşəbbüsləri bu sahədə tətbiq edərkən bu aspektləri nəzərə almışıq. Texnoloji sahədə biz yeni həllər tətbiq edərək, məlumatlarla işin yeni üsullarına sürətlə uyğunlaşmaq üçün infrastruktur və texnoloji baza yaratdıq. Mədəniyyət baxımından seminarlar və təlim proqramları keçirməyə başladıq, təşkilati dəyişikliklər sahəsində isə hibrid transformasiya həyata keçirdik. Bu yanaşma uğurlu oldu, çünki Mükəmməllik Mərkəzi yalnız məlumatlarla işləmə təcrübəsi olmayan departamentləri deyil, həm də məlumat yönümlü prosesləri artıq tətbiq etmiş departamentləri dəstəkləyirdi. Biz sürətli nəticələr əldə etməyə və işimizin dəyərini nümayiş etdirməyə çalışırdıq", — o izah edib.
Qeyd edək ki, “PAŞA Holding”in təşkilatçılığı ilə həyata keçirilən bu sammitin məqsədi ölkədə innovasiya ekosisteminin inkişafına töhfə vermək, startaplar və investorları bir araya gətirərək, onlara əməkdaşlıq üçün fürsət yaratmaq, eləcə də, innovasiya ekosisteminin bütün iştirakçıları arasında fikir və təcrübə mübadiləsi üçün platforma qurmaqdır.