Əlcəzair. Trend:
Məhdud dövlət resursları və artan ehtiyaclar şəraitində maliyyələşdirmə mənbələrinin, o cümlədən, özəl kapitalın cəlb edilməsi yolu ilə şaxələndirilməsi mühüm əhəmiyyət kəsb edir.
Trend-in xüsusi müxbiri xəbər verir ki, bunu Dünya Bankının Məğrib və Malta üzrə direktoru Ahmadu Mustafa Ndiaye Əlcəzairdə İslam İnkişaf Bankı Qrupunun (İİB) İllik Toplantıları çərçivəsində keçirilən “Baxışdan fəaliyyətə: İqtisadi diversifikasiya struktur transformasiya üçün rıçaq kimi” adlı panel müzakirəsi zamanı deyib.
"Biz resursların, xüsusən də dövlət resurslarının çox məhdud olduğu və tələbatın yüksək olduğu bir kontekstdəyik. Ona görə də maliyyə mənbələrinin şaxələndirilməsi xüsusilə vacib olur", - Ndiaye vurğulayıb.
O qeyd edib ki, çoxtərəfli inkişaf institutlarının rolu əhəmiyyətli olaraq qalır, lakin iştirakçı ölkələr üçün mövcud olan resursların həcmi məhduddur.
"Ona görə də özəl kapitalı səfərbər etmək üçün kampaniyaya başlamaq son dərəcə vacibdir. Bu gün biz getdikcə daha çox beynəlxalq resurslardan özəl sərmayələri cəlb etmək üçün rıçaq kimi istifadə edilməli olduğu barədə danışırıq", - deyə o bildirib.
Dünya Bankının nümayəndəsinin sözlərinə görə, bunun baş verməsi üçün müvafiq şərait yaradılmalıdır.
"Ölkə hazır olmalıdır. Biz makro səviyyədə işləməli, iqtisadi sabitliyi və proqnozlaşdırıla bilənliyi təmin etməliyik ki, özəl investorlar öz layihələrini həyata keçirə bilsinlər", - Ndiaye qeyd edib.
O, həmçinin, milli səviyyədə prioritetlərin müəyyən edilməsinin və makroiqtisadi intizam siyasətinin aparılmasının vacibliyini vurğulayıb.
Strateji yanaşmalardan danışan Ndiaye qeyd edib ki, bunlardan biri də təbii ehtiyatlardan istifadədir.
"Bir çox ölkələrin hələ də əhəmiyyətli təbii və mineral sərvətləri var. Problem dəyər zəncirinə necə daxil olmağı anlamaqdır", - o izah edib.
Ndiaye bu kontekstdə Səudiyyə Ərəbistanından misal çəkib: “Bu ölkə emal və sənaye kimi sahələrdə dəyər zəncirində yuxarıya doğru irəliləmək üçün öz resurslarından səmərəli istifadə edə bilib”.
O, həmçinin, qeyd edib ki, hazırkı İİB iclaslarına ev sahibliyi edən Əlcəzair öz resurslarından ixrac sektorlarını inkişaf etdirmək üçün istifadə edən ölkə nümunəsidir.