Bakı. Trend:
Azərbaycanın İqtisadiyyat Nazirliyi yanında Dördüncü Sənaye İnqilabının Təhlili və Koordinasiya Mərkəzi (4SIM) Azərbaycan şirkətlərini inkişaf etdirmək, onları daha səriştəli və öz təcrübələrini ölkə xaricində də paylaşmağa qadir etmək məqsədini güdür.
Trend xəbər verir ki, bunu Bakıda PASHA Holding tərəfindən təşkil edilən "INMerge Innovation Summit" çərçivəsində 4SIM-in icraçı direktoru Fariz Cəfərov deyib.
Onun sözlərinə görə, mərkəz texnologiyalar və innovasiyalar sahəsində beynəlxalq təcrübəni öyrənərək ən yaxşı praktikaları ölkə iqtisadiyyatına tətbiq etmək və müəssisələrin rəqəmsal transformasiyasını stimullaşdırmaq üzərində çalışır. Təşəbbüslər sırasında azərbaycanlılara "Coursera" təhsil platformasına pulsuz çıxış, sənaye şirkətləri üçün Industry 4.0 proqramları və insan kapitalının inkişafına təlim və məsləhətlər vasitəsilə dəstək yer alır.
“Hazırda hər kəs bizdə öyrənə və ən yaxşı təcrübələri mənimsəyə bilər”, - deyə Cəfərov qeyd edib.
O vurğulayıb ki, uğurlu rəqəmsal transformasiya üçün bütün komponentlərin- texnologiyaların, institutların hazırlığının və kadr potensialının koordinasiyalı işi vacibdir. Yalnız bu halda innovasiyaları səmərəli tətbiq etmək və şirkətlərin beynəlxalq arenada rəqabət qabiliyyətini artırmaq mümkündür.