Bakı.Trend:
Azərbaycan Memarlıq və İnşaat Universiteti (AzMİU) ilə Azərbaycan Respublikası Elm və Təhsil Nazirliyinin İqtisadiyyat İnstitutu arasında təhsil, elm və ixtisasartırma sahəsində əməkdaşlığa dair Memorandum imzalanıb.
AzMİU-da keçirilən imzalanma mərasimində universitetin rektoru, memarlıq doktoru, professor Gülçöhrə Məmmədova və İqtisadiyyat İnstitutunun baş direktoru, iqtisad elmləri doktoru, professor Nazim Müzəffərli (İmanov), eləcə də hər iki qurumun nümayəndə heyəti iştirak edib.
Memorandum iki qurum arasında elmi-tədqiqat, innovasiya, kadr hazırlığı, istehsalat təcrübəsi və məşğulluq sahələrində qarşılıqlı əməkdaşlığın genişləndirilməsini nəzərdə tutur. Sənəd, tərəflərin elmi və akademik potensialının birləşdirilməsi, birgə layihələrin həyata keçirilməsi, magistr və doktorantların elmi fəaliyyətinin dəstəklənməsi, eləcə də iqtisadi və şəhərsalma yönümlü tədqiqatların praktiki tətbiqi baxımından mühüm əhəmiyyət daşıyır.
Əməkdaşlıq çərçivəsində birgə elmi araşdırmaların aparılması, simpozium və konfransların təşkili, elmi nəşrlərin hazırlanması, tədris prosesində elmi-analitik nəticələrdən istifadə və beynəlxalq layihələrdə ortaq iştirak əsas istiqamətlər kimi müəyyənləşdirilib.
AzMİU-nun rektoru professor Gülçöhrə Məmmədova çıxış rdərək bildirib ki, müasir universitet modeli yalnız tədrislə məhdudlaşmamalı, elm, innovasiya və istehsalatla sıx əlaqə üzərində qurulmalıdır:
“İqtisadiyyat İnstitutu ilə imzaladığımız bu Memorandum AzMİU-nun elmi potensialının iqtisadi tədqiqatlarla daha sıx inteqrasiyasına xidmət edir. Memarlıq, şəhərsalma, infrastruktur və dayanıqlı inkişaf məsələləri bu gün iqtisadi analizsiz təsəvvür olunmur. Bu əməkdaşlıq həm gənc tədqiqatçıların, həm də doktorant və magistrantların elmi inkişafına yeni imkanlar açacaq”.
Rektor vurğulayıb ki, AzMİU ölkənin sosial-iqtisadi inkişaf prioritetlərinə uyğun elmi təşəbbüsləri dəstəkləməyə və elm tutumlu müəssisələrlə strateji tərəfdaşlığı genişləndirməyə xüsusi önəm verir.
İqtisadiyyat İnstitutunun baş direktoru, professor Nazim Müzəffərli çıxışında AzMİU-nun elmi və akademik mühitini yüksək qiymətləndirərək bildirib ki, bu əməkdaşlıq fundamental iqtisadi tədqiqatların real tətbiq sahələrinə çıxışını gücləndirəcək:
“AzMİU ilə əməkdaşlıq bizim üçün xüsusi əhəmiyyət daşıyır. İnfrastruktur, regionların inkişafı, şəhər iqtisadiyyatı və dayanıqlı planlaşdırma sahələrində aparılan tədqiqatların elmi əsaslarla və praktik yanaşma ilə həyata keçirilməsi bu Memorandumun əsas hədəflərindəndir. Birgə layihələr vasitəsilə elmi biliklərin real qərarvermə proseslərinə inteqrasiyasını gücləndirməyi qarşıya məqsəd qoyuruq”.
Çıxışlardan sonra tərəflər arasında nümayəndə heyətlərinin də iştirakı ilə müzakirələr aparılıb. Görüş zamanı mövcud əməkdaşlığın bu Memorandum vasitəsilə daha da dərinləşdirilməsi, konkret layihələr üzrə fəaliyyət planlarının hazırlanması və uzunmüddətli tərəfdaşlıq mexanizmlərinin qurulması ilə bağlı fikir mübadiləsi aparılıb.
