Trampın Beynəlxalq Sülh və Rifah Marşrutu (TRIPP) Mərkəzi Asiyadan Avropaya və ondan kənara iqtisadi inteqrasiyanı gücləndirəcək.
Trend-in xüsusi müxbiri xəbər verir ki, bunu bu gün ABŞ Dövlət Katibinin Enerji və Kritik Minerallar üzrə köməkçisinin müavini Reggie Singh ABŞ-Azərbaycan Ticarət Palatasının 30 illiyinə həsr olunmuş ABŞ-Azərbaycan ticarət və biznes konfransında çıxışı zamanı bildirib.
"Amerika Birləşmiş Ştatları ilə Azərbaycan arasında münasibətlər misli görünməmiş şəkildə dəyişib. Bu dəyişikliklər ötən il avqustun 8-də ABŞ Prezidenti Donald Tramp, Azərbaycan Prezidenti İlham Əliyev və Ermənistanın Baş naziri Nikol Paşinyanın qatıldığı tarixi sülh sammiti sayəsində mümkün olub. Bu sammit Ermənistanla Azərbaycan arasında 30 illik uzunmüddətli münaqişəyə son qoymaq üçün yol açdı və Cənubi Qafqazda yeni sabitlik, təhlükəsizlik və rifah dövrünün başlanğıcını qoydu. Sülhə nail olmaq üçün əsas vasitələrdən biri Trampın Beynəlxalq Sülh və Rifah Marşrutunun (TRIPP) yaradılması idi. TRIPP, onilliklər ərzində ilk dəfə olaraq Azərbaycanın əsas hissəsini Naxçıvanla birləşdirəcək, uzun müddət bağlı olan regional ticarət yollarını yenidən açacaq və Mərkəzi Asiyadan Avropaya və ondan kənara iqtisadi inteqrasiyanı və əlaqəni gücləndirəcək inqilabi, unikal bir layihədir", - o deyib.
Sinq qeyd edib ki, hər iki ölkə Strateji Tərəfdaşlıq Xartiyası çərçivəsində enerji, nəqliyyat bağlantısı, ticarət və qarşılıqlı investisiya sahələrində ikitərəfli əməkdaşlığı gücləndirməyə birgə sadiqdir.
"Əməkdaşlıq mövzularına süni intellekt və rəqəmsal inkişaf, təhlükəsizlik və müdafiə məsələləri və digər məsələlər daxildir. Enerji sektorunda Xartiya Azərbaycan və üçüncü ölkələrlə əlaqələndirici layihələr, təchizat marşrutlarının şaxələndirilməsi, üç qovşaqlı rabitə, mülki nüvə əməkdaşlığı və neft, qaz və elektrik enerjisi sektorlarına özəl investisiyaların səfərbər edilməsi üzrə əməkdaşlığa üstünlük verir. Gələcək əməkdaşlıq üçün bir model olaraq, Xartiya Cənub Qaz Dəhlizi kimi iddialı layihələrin birgə həyata keçirilməsindəki keçmiş təcrübəmizi vurğulayır ki, bu da birlikdə işləməklə nələrə nail ola biləcəyimizi nümunə göstərir", - o əlavə edib.