Daşkənd. Trend:
Maliyyə təşkilatları süni intellekt texnologiyalarının fəal tətbiqindən əvvəl rəqəmsal infrastrukturu və təhlükəsizlik sistemlərini gücləndirməlidirlər.
Bu barədə Trend-in Daşkənddən olan xüsusi müxbirinə Daşkənddə keçirilən İpək Yolu Maliyyəsi və Texnologiya Forumu çərçivəsində Ipak Yuli Bankın baş direktoru Umid Hakimov bildirib.
Hakimovun sözlərinə görə, süni intellektdən istifadə maliyyə təşkilatlarına, o cümlədən bir sıra proseslərin avtomatlaşdırılması hesabına xərcləri optimallaşdırmağa kömək edə bilər.
“Bizdə 20 milyondan çox POS-terminal var. Bu, kifayət qədər bahadır və süni intellektdən istifadə həqiqətən də xərcləri azaltmağa kömək edə bilər”, - deyə o bildirib.
Bununla yanaşı, o vurğulayıb ki, səmərəliliyə təhlükəsizliyin hesabına nail olunmamalıdır.
“Biz onunla bağlı riskləri anlamadan süni intellektdən istifadə edə bilmərik. Bir tərəfdən, bu, təhlükəsizlik məsələsidir. Digər tərəfdən, əvvəlcə müvafiq infrastrukturu yaratmalıyıq”, - deyə Hakimov qeyd edib.
Onun sözlərinə görə, maliyyə təşkilatları süni intellektdən istifadə ilə bağlı potensial riskləri, o cümlədən informasiya sistemləri və məlumatlar üçün mümkün təhdidləri əvvəlcədən qiymətləndirməlidirlər.
“Biz məlumatlarımızı qorumaq üçün vaxtında və effektiv addımlar atmaq məqsədilə bundan bilik, alət və təcrübə kimi istifadə etməliyik”, - deyə o bildirib.
Hakimov qeyd edib ki, Ipak Yuli Bank hazırda əsas diqqəti infrastrukturun inkişafına yönəldir, bundan sonra isə səmərəliliyin artırılmasına və xərclərin optimallaşdırılmasına fokuslanmağı planlaşdırır.
O, həmçinin daha əvvəl qeyd edib ki, maliyyə xidmətlərinə ilk dəfə çıxış əldə edən istifadəçilərin sayının artması maliyyə savadlılığının və məlumatların qorunmasının əhəmiyyətini artırır. Onun sözlərinə görə, kibertəhlükəsizlik sahəsində əlavə yük bankların üzərinə düşür, çünki kiçik və orta biznesin bir çox nümayəndəsinin öz IT və kibertəhlükəsizlik komandaları yoxdur.
