Bakı. Trend:
Azərbaycan Mərkəzi Bankı (AMB) “İdeal Kredit” MMC bank olmayan kredit təşkilatını (BOKT) və onun vəzifəli şəxsini inzibati məsuliyyətə cəlb edib.
Bu barədə AMB məlumat yayıb.
Məlumata görə, Mərkəzi Bankın apardığı cari nəzarət tədbirləri çərçivəsində cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin tələblərinin pozulması müəyyən edilib.
Bununla əlaqədar Bakı şəhəri Nərimanov Rayon Məhkəməsinin qərarı ilə İnzibati Xətalar Məcəlləsinin 598.1.1-ci və 598.1.2-ci maddələrinə əsasən “İdeal Kredit” MMC 50 min manat, təşkilatın vəzifəli şəxsi isə 6 min manat məbləğində cərimələnib.
Beləliklə, təşkilat və onun vəzifəli şəxsi üzrə tətbiq edilən cərimələrin ümumi məbləği 56 min manat təşkil edib.
Qeyd edək ki, Mərkəzi Bankın BOKT-lərə münasibətdə nəzarət fəaliyyəti kredit sektorunda maliyyə sabitliyinin və qanunvericilik tələblərinə əməl olunmasının təmin edilməsi istiqamətlərindən biridir.
AMB-nin məlumatına əsasən, 2026-cı il avqustun 1-nə Mərkəzi Bankın banklara və bank olmayan kredit təşkilatlarına xalis tələbləri 5,077 milyard manat təşkil edib.
Trend-in AMB-nin məlumatları əsasında hesablamasına görə, bu göstərici iyulun 1-i ilə müqayisədə 672,8 milyon manat və ya 11,7 faiz azalıb. Ötən ilin avqustun 1-i ilə müqayisədə isə xalis tələblər 2,8 milyard manat və ya 35,5 faiz azalıb.
Müqayisə üçün, 2026-cı il iyulun 1-nə AMB-nin banklara və BOKT-lərə xalis tələbləri 5,749 milyard manat, 2025-ci il avqustun 1-nə isə 7,866 milyard manat olub.
Hazırda AMB-nin reyestrində 50-dən çox lisenziyalı BOKT fəaliyyət göstərir. Onların arasında “Aqrarkredit” QSC BOKT, “PARA” BOKT ASC, “FİNCA Azerbaijan” QBKT, “KredAqro” BOKT MMC, “FinEx Kredit” BOKT ASC, “AzFinans” BOKT MMC, “İrşad BOKT” MMC, “AZPUL” BOKT MMC və “Nova Credit BOKT” MMC də yer alır.
