Azərbaycan, Bakı / Trend , müxbir İ.Xəlilova / Cümə axşamı Azərbaycanın İqtisadi İnkişaf nazirinin müavini, Qara dəniz Ticarət və İnkişaf bankında Azərbaycan tərəfinin rəhbəri Mikayıl Cabbarovun verdiyi məlumata görə, sentyabrın 29-da Qara Dəniz Ticarət və İnkişaf Bankının Direktorlar Şurasının İstanbulda keçirilən 56-cı iclasında Azərbaycanın özəl banklarından birinə 5 illik müddətə 10 mln. dollar dəyərində kreditin ayrılması təsdiq olunub.
Qara Dəniz Ticarət və İnkişaf Bankının növbədənkənar iclasında bankın Nizamnamə Fondunun artırılması məsələsinin nəzərdən keçirilməsi ilə bağlı qərar qəbul olunub. İclas oktyabrın sonuna təyin olunub. "Bankın fəaliyyəti gözlənilən proqnozları üstələyir, bankın kredit portfeli 600 mln. dollara çatır, bu səbəbdən də, tezliklə kapitalın artırılması məsələsinə yenidən baxılacaq" - deyə Cabbarov bildirib.
Qara Dəniz Ticarət və İnkişaf Bankının rəhbərliyi bu təklifi səhmdarların müzakirəsinə çıxaracaq, Azərbaycan bankın təsisçilərindən bir kimi onun kapitallaşmasında iştirak edəcək. Bütün parametrlər növbədənkənar iclasda müzakirə olunacaq.
Qara Dəniz Ticarət və İnkişaf Bankının elan olunmuş Nizamnamə kapitalının həcmi 1 mlrd. SDR (1,135 mlrd. dollar) təşkil edir ki, bu məbləğin yalnız 30%-i ödənilib. Azərbaycanın iştirak payı 2% təşkil edir və bu məbləğ tamamilə bankın kapitalına daxil edilib.