Azərbaycan, Bakı / Trend müxbir U.İsmaylova/ İlin sonuna qədər Bakının təkrar əmlak bazarı və torpaq bazarında qiymətlər daha 10 faiz artacaq. Bu proqnozu şənbə günü "Daşınmaz əmlak bazarı iştirakçıları" İctimai Birliyinin icraçı direktoru Nüsrət İbrahimov verib.
Onun sözlərinə görə, Bakının təkrar və torpaq bazarlarında tələbatın artması əhalinin inamı ilə əlaqədardır.
İlin əvvəlindən Bakının daşınmaz əmlak bazarında qiymətlər 35-40 faiz artıb.
İbrahimovun sözlərinə görə, ilkin bazarda qiymətlərin dəyişməsini gözləməyə dəyməz.
"İlkin bazarda qiymətlərin donmasına avqustda Bakıda yeni tikilinin uçması təsir edib" - deyə İbrahimov bildirib.
Avqustun 28-də Bakıda tikilən 16 mərtəbəli bina uçub və nəticədə 25 nəfər ölüb.