Azərbaycan, Bakı, 29 aprel / Trend , müxbir İ.Xəlilova/ "Moody's Investors Service" Beynəlxalq Reytinq Agentliyi Azərbaycanın "Texnika Bank"ının avroistiqrazlarına uzunmüddətli "B2" reytinqi verib, reytinqin proqnozu "mənfi"dir", agentliyin məlumatında bildirilir.
"Moody's" həmçinin milli və xarici valyuta ilə bank depozitlərinin "B2" reytinqinin proqnozunu "stabil"dən "mənfi" reytinq proqnozuna dəyişdirib.
Avrobondlar 3-5 illik tədavül müddəti ilə buraxılacaq. Bunun üçün bank "Texnika Bank" üçün kreditlərin maliyyələşdirilməsi məqsədilə Niderlandda "Texnika Finance B.V." şirkətini qeydiyyatdan keçirib.
Avroistiqrazların emissiyasının həcmi və kuponların faiz dərəcəsi hələ dəqiqləşdirilməyib, lakin buraxılışın maksimal məbləği 200 mln. dollar təşkil edəcək.
Agentliyin ekspertlərinin fikrincə, "mənfi" proqnoz onu göstərir ki, 200 mln. dollar həcmində yerləşdirmə bu ölçüdə olan bank üçün həddindən artıq böyükdür və bank rəhbərliyinin xeyli artan "risk iştahası"nı əks etdirir. Bu yerləşdirmə ilə əlaqədar olaraq yenidən maliyyələşdirmənin potensial riskləri "Moody's"da "Texnika Bank"ın öz üzərinə götürdüyü risk həcmləri ilə və onun ehtiyat bazasının bazar borclarından asılılıq səviyyəsi ilə bağlı narahatlıqlar doğurur. Bütün bunlar bankın müstəqil maliyyə dayanıqlığının azalmasına səbəb ola bilər, məlumatda bildirilir.
"Moody's"in kiçik vitse-prezidenti və aparıcı analitiki Roman Piven hesab edir ki, "mənfi" proqnozu risklərin artması barədə xəbərdarlıqdır. Bu risklərin artımı bankın öz borclarını çoxaltmaq niyyəti ilə əlaqədardır. Dünya bazarlarında likvidlik və volotillik ilə bağlı vəziyyətin hansı istiqamətdə inkişaf etməsi ilə əlaqədar qeyri-müəyyənlik, bankın yenidən maliyyələşmə risklərinin yaranmasına səbəb ola bilər, deyə o bildirib.
Məlumatda deyildiyi kimi, emissiyaların maksimal məbləğini nəzərə alaraq bankın kapital strukturunda borc vəsaitlərinin payı həddindən artıq yüksək olacaq, belə ki, avroistiqrazın tədavül müddətinin sonunda bankı böyük ödənişlər gözləyir, müvafiq olaraq isə yenidən maliyyələşmə riskləri artır.
Reytinq proqnozu "Texnika Bank"ın kredit riskləri və yenidən maliyyələşmə risklərinin idarə olunmasında ağıllı siyasət nümayiş etdirsə, kapitallaşdırmanı artırsa və öz bazar mövqelərini genişləndirsə, yenidən "stabil" reytinq proqnozuna dəyişdirilə bilər. "Moody's" hesab edir ki, bu şərtlərin yerinə yetirilməsinə bank tərəfindən planlaşdırılan mülkiyyət strukturunun dəyişdirilməsi səbəb ola bilər, belə ki, bank səhmlər paketini beynəlxalq maliyyə institutlarından birinə verməyi planlaşdırır.
Hazırda bankın majoritar səhmdarı 75 faiz səhmlərə malik olan "World Wines" şirkətidir. Bankın Nəzarət Şurasının sədri Etibar Əliyev səhmlərin 15 faizinə, Amerikanın "Kazimir Investment Caspian Fund" şirkəti isə 10 faizinə nəzarət edir.
"Texnika Bank" dünyanın maliyyə bazarlarındakı vəziyyətlə əlaqədar olaraq bir neçə dəfə avrobondların buraxılışını təxirə salıb. Bankın rəhbərliyi aparılmış marketinq araşdırmaları ilə əlaqədar olaraq ilk avrobondların təkcə banklar arasında deyil, ümumilikdə bütün respublikada uğurla yerləşdirilməsinə əmindir. Bankın qiymətli kağızları ilə maraqlanan konkret səhmdarlar var. Bununla əlaqədar olaraq bank gələcək avrobondlar potfelində genişləndirmələrin mərhələliliyini müəyyənləşdirib.
"Texnika Bank"ın avrobondların yerləşdirməsinə yardım üzrə lid-meneceri "Morgan Stanley"dir.
Azərbaycanın Milli Bankının aprelin 29-na olan rəsmi məzənnəsi 0,8288 AZN/USD təşkil edir.
Müəlliflə əlaqə saxlamaq üçün elektron ünvanı: [email protected]
