Azərbaycan, Bakı, 08 may/ Trend , müxbir Ü.İsmayılova/Azərbaycanda inflyasiyanın səviyyəsi illik hesablamada 26,41 faiz təşkil edib. Bu barədə cümə axşamı "İqtisadi Tədqiqatlar Mərkəzi" QHT-nin rəhbəri Qubad İbadoğlu məlumat verib.
İbadoğlunun sözlərinə görə, yanvar-apreldə Azərbaycanda inflyasiyanın səviyyəsi 13,03 faiz (o cümlədən ərzaq mallarında - 19,66 faiz, qeyri-ərzaq - 6,67 faiz, xidmətlər - 4,27 faiz) təşkil edib.
Apreldə Azərbaycanda istehlak qiymətləri indeksi 3,12 faiz, Bakıda 2,92 faiz təşkil edib. Ay ərzində ərzaq mallarının qiyməti 4,23 faiz, qeyri-ərzaq - 1,96 faiz, xidmətlər - 1,95 faiz artıb.
Ölkə regionlarında istehsal qiymətləri indeksi 3,39 faiz təşkil edib. Ərzaq mallarının qiyməti 3,88 faiz, qeyri-ərzaq - 2,50 faiz, xidmətlər - 3,22 faiz artıb.
Ekspertin hesablamalarına görə, apreldə göyərtinin (68 faiz), toyuq yumurtasının (19 faiz), kartofun (4,5 faiz), xiyar (3,7 faiz) və almanın (3,2 faiz) qiyməti azalıb.
Əsasən, limon (130 faiz), düyü (30 faiz), yüksək növlü çörək (22 faiz), pivə (20,93 faiz), validol həbləri (18,75 faiz), bulka (16,98 faiz), sement (12,3 faiz), un (12,25 faiz), ət (12,20 faiz), mövsümi uşaq geyimləri (40 faiz) bahalaşıb.
Ekspertin hesablamalarına görə, işqabiliyyətli əhali üçün minimal istehlak səbəti 113,18 manat, ərzaq məhsulları üzrə 68,01 manat, qeyri-ərzaq - 21,18 manat, xidmətlər üzrə - 23,99 manat təşkil edib.
Azərbaycanın Dövlət Statistika Komitəsinin məlumatına əsasən, yanvar-martda ölkədə inflyasiyanın səviyyəsi 16,5 faiz təşkil edib.
Müəlliflə əlaqə saxlamaq üçün elektron ünvan: [email protected]
