Azərbaycan, Bakı, 19 sentyabr/ Trend , müxbir E.İsmayılov/ "İqtisadi Tədqiqatlar Mərkəzi (İTM) 2009 - cu ildə də "Alternativ inflyasiya səviyyəsinin hesablanması" proqramının realizəsini davam etdirməyə hazırdır", - Mərkəzin sədri Qubad İbadoğlu cümə günü bildirib.
Layihə 2007- ci ildən ABŞ -ın Beynəlxalq İnkişaf Agentliyinin (USAİD) maliyyə dəstəyi ilə reallaşdırılmağa başlayıb. 2008 - ci ildə proqram üzrə tədqiqatlar Macarıstanın institusional yardım fondunun "Açıq Cəmiyyət İnstitutu" layihəsi çərçivəsində aparılır.
"Hazırda gələn il üçün maliyyələşdirmə mənbəyi müəyyən edilir, - İbadoğlu bildirib. - Xarici maliyyələşdirmə tapmasaq, o zaman layihəni mərkəzin vəsaitləri hesabına reallaşdıracağıq".
İTM - in sədri ölkədə inflyasiya məsələsinin kifayət qədər kəskin olması ilə əlaqədar layihənin davam etdirilməsinə zərurətin olduğunu hesab edir. Layihənin realizəsi müxtəlif ekspertlər və Dövlət Statistika Komitəsinin hesablamalarındakı fərqlə bağlı başlayıb. Bununla əlaqədar 2007 - ci ildə USAİD Azərbaycan üçün ən əlverişli üsulun aşkar edilməsinin alternativ mexanizmi və alternativ inflyasiyanın hesablama üsullarının hazırlanması məqsədilə inflyasiyanın hesablanmasının mövcud metodologiyasının qiymətləndirilməsinin aparılması barədə qərar qəbul edib.
Dünya təcrübəsində istehlak qiymətləri indeksinin hesablanması üçün istehlak səbətinin formalaşdırılmasına yanaşmada da fərqlər var. Azərbaycanda səbətə 585 mal və xidmət daxil olduğu halda, yaxın dövlətlərdə - məsələn, Gürcüstanda istehlak səbəti 311, Qırğızıstanda - 343, Ukraynada 270 növdən ibarətdir. İnkişaf etmiş ölkələrdə, eləcə də ABŞ - da səbət 200, Fransada isə, 161 növdən formalaşdırılıb. Müstəqil ekspertlər hesab edirlər ki, qiyməti illərlə dəyişməyən malları düzgün olmayaraq istehlak səbətinə daxil edirlər. Səbətə yalnız qiymətləri dəyişən mallar daxil edilməlidir.