Azərbaycan, Bakı, 24 noyabr / Trend , müxbir N.İsmayılova/ Azeri Fruit Co Meyvə Korporasiyasının yaradılması qeyri - müəyyən müddətə saxlanılıb, - bazar ertəsi Korporasiyanın həmtəsisçilərindən biri olan Garnet şirkətinin direktor müavini Tahir Məmmədov deyib.
"Hazırki böhran şəraitində əlavə maliyyələşmə olmadığından, Azeri Fruit Co Meyvə Korporasiyasının yaradılması ilə bağlı layihəni həyata keçirmək çox çətindir", - Məmmədov söyləyib.
Məmmədov onu da bildirib ki, maliyyə böhranı Garnet-in fəaliyyətinə heç bir təsir göstərməyib.
Azərbaycanın İnvestisiyalar və İxracın Təşviqi Fondundan (AZPROMO) deyiblər ki, iştirakçı şirkətlərin beynəlxalq maliyyə böhranının doğurduğu maliyyə problemləri üzündən, Azeri Fruit Co Meyvə Korporasiyasının gələcək inkişafı məsələsi gələn ilədək təxirə salınıb. Amma Azeri Fruit Co hələ də AZPROMO üçün prioritet istiqamətlərdən sayılır, - AZPROMO - nun İxracın Təşviqi Departamentinin direktoru Emil Ağayev qeyd edib.
AZPROMO Azeri Fruit Co-nun təşkilinə məsuldur və bu qurum Meyvə Korporasiyasının yaradılması ilə bağlı üçtərəfli memorandumun tərəfdaşlarından biridir. 2008 - ci il iyulun 1 - də SAF və "Garnet" (MilkPro şirkətinə daxildir) şirə istehsalçıları, Azərbaycan İnvestisiyalar Şirkəti (AİŞ) və AZPROMO arasında Azeri Fruit Co-nun yaradılması ilə bağlı üçtərəfli niyyət memorandumu imzalanıb. Sənədə uyğun olaraq, layihənin maliyyələşməsi, beynəlxalq maliyyə institutlarından əlavə vəsaitlərin cəlbi vəzifəsi AİŞ - ə tapşırılıb. Beynəlxalq Maliyyə Korporasiyası (BMK) artıq Meyvə Korporasiyasında iştirak etmək arzusunu bildirib.
Müəlliflə əlaqə ünvanı: [email protected]