Azərbaycan, Bakı, 16 yanvar/ Trend , müxbir Ü.İsmayılova/ Azərbaycanın Auditorlar Palatası təsərrüfat subyektlərinin maliyyə hesabatlarının aparılması zamanı riayət etməli olduqları normativ-hüquqi aktların siyahısını açıqlayıb. Təsərrüfat subyektləri maliyyə hesabatlarının düzgünlüyünü auditor rəyi ilə təsdiq etməlidirlər, - rəsmi mətbuat cümə günü xəbər verir.
Mühasibat uçotu aparılarkən və maliyyə hesabatları tərtib edilməsi zamanı şəffaflığa riayət olunması 2007-2011-ci illər üçün fəaliyyət planının bir hissəsidir. Fəaliyyət planı Azərbaycan prezidentinin 2007-ci il 28 iyul tarixli fərmanına müvafiq olaraq təsdiq edilmiş şəffaflığın artırılması və korrupsiyaya qarşı mübarizə üzrə Milli Strategiya çərçivəsində hazırlanıb.
Siyahıya əsasən, bank və digər kredit təşkilatları "Banklar haqqında", səhmdar cəmiyyətlər, məhdud məsuliyyətli cəmiyyətlər, fond və birjalar, qiymətli kağız emitentləri, büdcədənkənar fondlar - Azərbaycanın Mülki Məcəlləsi, sığorta və təkrarsığorta cəmiyyətləri - "Sığorta fəaliyyəti haqqında", sərmayə fondları - "Sərmayə fondları haqqında", maliyyə-sənaye qrupları - "Maliyyə-sənaye qrupları haqqında" Qanuna riayət etməlidirlər.
İctimai əhəmiyyətli qurumlar, birləşdirilmiş hesabatlar təqdim edən hüquqi şəxslər (holdinqlər), təbii inhisar fəaliyyəti subyektləri, QHT-lər "Mühasibat uçotu haqqında" Qanuna, bələdiyyələr - "Bələdiyyələrin maliyyəsinin əsasları haqqında" Qanuna riayət etməlidirlər.
Dövlət orqanlarının öz səlahiyyətləri çərçivəsində müəssisələrin (vergi ödəyicilərinin) fəaliyyətini araşdırmaları təsərrüfat subyektlərini qanuni auditor yoxlamasından azad etmir.
Müəlliflə əlaqə saxlamaq üçün elektron ünvan: [email protected]
