Azərbaycanın ən iri bankı dövlət köməyi olmadan xarici borclarını qaytarıb

Azərbaycan, Bakı, 17 aprel / Trend , müxbir İ.Xəlilova /

Azəbaycan Beynəlxalq Bankı (ABB) xaricdən cəlb etdiyi vəsaitin bir milyardını artıq qaytarıb. Bu barədə ABB-nin idarə heyətinin sədri Cahangir Hacıyev deyib.

"Götürülən vəsaitin qaytarılması hökumət və Mərkəzi bankın köməyi olmadan həyata keçirilib və bu, bankın sabit olduğunun göstəricisidir. Xarici kreditləri dövlət zəmanəti olmadan necə cəlb etmişdiksə, eləcə də şəxsi ehtiyatlarımız hesabına qaytardıq", - Hacıyev deyib.

Bank rəsmisinin sözlərinə əsasən, indiyədək götürülən kreditləri qaytarmaqla yanaşı, ABB paralel olaraq yeni kreditlər də cəlb edir və bu, Azərbaycana olan etimadın göstəricisidir.  

"Bankın sabitliyini depozit həcminin artması da təsdiqləyir", - Hacıyev qeyd edib.

İyulda sindikatlaşdırılmış kredit üzrə daha 100 milyon dollar vəsaitin qaytarılması nəzərdə tutulur. Bankın yalnız səkkiz il müddətinə ayrılan subordinar kredit üzrə borcu qalır.

Maliyyə böhranı ilə əlaqədar olaraq dünya kapital bazarlarında likvidlik problemi müşahidə edilir və bu səbəbdən xarici kreditlərin cəlb olunmasında hazırda çətinliklər var.

Azərbaycan banklarının ümumilikdə xaricdən əldə etdikləri kreditlərin 2,5 milyard dolları ABB-nin üzərinə üşür.