Azərbaycan, Bakı, 23 aprel / Trend , müxbir N.İsmayılova /
"Beynəlxalq Valyuta Fondunun (BVF) proqnozlarına görə, 2009-cu ildə Azərbaycanda inflyasiya 4 faiz təşkil edəcək", - BVF-in rəsmi saytında yerləşdirilən "Dünya iqtisadiyyatının inkişaf perspektivləri" hesabatında deyilir. BVF-in proqnozuna əsasən, ölkədəki inflyasiyanın 2010-cu ildəki səviyyəsi 8 faiz olacaq.
Azərbaycan Mərkəzi Bankının idarə heyətinin sədri Elman Rüstəmov Nazirlər Kabinetinin ölkənin 2008-ci ildəki sosial-iqtisadi inkişafının yekunlarına həsr olunmuş iclasında deyib ki, Mərkəzi Bank 2009-cu ildə təkrəqəmli inflyasiyaya nail olmağı real sayır.
Azərbaycan Dövlət Statistika Komitəsinin sədr müavini Arif Vəliyevin sözlərinə görə, dünyəvi proseslərin və Azərbaycan Hökumətinin həyata keçirdiyi antiinflyasiya tədbirlərinin təsiri ilə 2009-cu ildə ölkədə nəinki təkrəqəmli inflyasiya, hətta deflyasiya da müşahidə oluna bilər.
2008-ci ilin yekunlarına əsasən istehlak məhsulları və xidmət tarifləri 2007-ci illə müqayisədə 20,8 faiz bahalaşıb. Ötən ilin dekabrında isə 2007-ci ilin dekabrına nisbətən 0,4 faiz ucuzlaşıb.
Məqalə müəllifi ilə əlaqə ünvanı: [email protected]
