...

AİB təcili reaksiya kapitalını üç dəfə artıracaq

Biznes və iqtisadiyyat xəbərləri Materials 4 May 2009 17:12
AİB təcili reaksiya kapitalını üç dəfə artıracaq

Trend-i buradan izləyin

Azərbaycan, Bakı, 04 may / Trend , müxbir N.İsmayılova /

"Asiya Sakit okean regionunda iqtisadiyyatın məcmu artımı, proqnozlara əsasən, bu il 3,4 faizə düşəcək. Qeyd edim ki, 2007-ci ildə bu rəqəm 9,5 faizlik rekord həddə çatmışdı", - mayın 2-5-də Asiya İnkişaf Bankının (AİB) idarə şurasının Balidəki (İndoneziya) illik iclasında AİB prezidenti Haruhiko Kuroda deyib.

O, regionda kasıblığın azaldılması və iqtisadiyyatın inkişafının dəstəklənməsi səylərinin davam etdirilməsinin vacibliyini vurğulayıb.

"Bizim cari proqnozlara əsasən, daha 60 milyon nəfər bu il və daha 100 milyon nəfər gələn il Asiya və Sakit Okean regionunda kasıblıq həddində yaşayacaq", - Kuroda deyib.

İllik toplantı idarə heyətinin səsverməsi ilə davam edir. Məqsəd bankın kapital bazasının həcmini üç dəfə artıraraq 55 milyard dollardan 165 milyard dollara çatdırmaqdır. 200 faizlik artım AİB-ə uzunmüddətli inkişaf məqsədlərinə diqqət ayıraraq, üzv ölkələrin təcili tələblərinə tez və məhsuldar cavab vermək imkanı qazandıracaq.

Dünya maliyyə böhranına cavab olaraq AİB 2009-2010-cu illərdə əlavə 10 milyard dollarlıq yardım ayıracaq.

"Milli və regional səylər və gələn il dünya iqtisadiyyatında gözlənilən mülayim bərpa ilə Asiyanın inkişaf etməkdə olan ölkələri 2010-cu ildə 6 faizlik artıma nail olmalıdırlar", - Kuroda bildirib.

Toplantıda Azərbaycanı maliyyə naziri, ölkənin AİB-dəki alternativ idarəçisi olan Samir Şərifov təmsil edir. Baliyə həmçinin, bir sıra kommersiya banklarından nümayəndə heyətləri yollanıb.

AİB 1966-cı ildə yaradılıb və 67 üzvü var. Bankın mənzil-qərargahı Manilada (Filippin) yerləşir. Azərbaycan AİB üzvlüyünə 22 dekabr 1999-cu ildə qəbul edilib və ölkənin bankın kapitalındakı iştirak payı 0,5 faizdir.

AİB-in aparıcı səhmdarları Yaponiya və ABŞ (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və b.-dır.

Məqalə müəllifi ilə əlaqə ünvanı: [email protected]

Xəbər lenti

Xəbər lenti