Azərbaycan, Bakı, 07 may / Trend , müxbir Ü.İsmayılova /
Hazırda Azərbaycanda daxili ərzaq malları hesabına əhalinin 95 faizi təmin edilir. Bu barədə cümə axşamı Azərbaycanın kənd təsərrüfatı naziri İsmət Abbasov bildirib.
"Bizim əsas məqsədimiz daxili istehsal hesabına əhalini ərzaq malları ilə 100 faiz təmin etməkdir", - deyə nazir bildirib.
Onun sözlərinə görə, bu il aparılan səmərəli işlər nəticəsində Azərbaycanda ərzaq taxılına olan tələbat tam olaraq ödəniləcək.
"Taxıl istehsalçılarının texnika ilə təmin edilməsi məqsədilə bu günlərdə Kənd Təsərrüfatı Nazirliyi taxıl yığımı üçün əlavə olaraq 180 kombayn alıb", - deyə Abbasov vurğulayıb.
2008-ci ildə Azərbaycanda taxıl istehsalı 500 min ton artıb. Bu il əkin sahələrinin əlavə olaraq 800 min hektar səviyyəsində artırılması planlaşdırılır.
Ölkənin taxıla olan illik tələbatı üç mln. ton təşkil edir, bu göstəricinin 1,5 mln. tonu ərzaq taxılının payına düşür.
Məqalə müəllifi ilə əlaqə ünvanı: [email protected]