Azərbaycan, Bakı, 21 may / Trend , müxbir N.İsmayılova /
"İqtisadi Əməkdaşlıq Təşkilatının (İƏT) üzv ölkələri təşkilatın üzvləri arasında informasiya mübadiləsinin yaxşılaşdırılması məqsədilə özəlləşdirmə üzrə sayt yaradırlar", - bu gün Bakıda keçirilən İƏT ölkələrinin özəlləşdirmə şobəsi rəhbərlərinin dördüncü toplantısında, Əmlak Məsələləri üzrə Dövlət Komitəsinin sədri Kərəm Həsənov deyib.
"Saytda İƏT-nin bütün üzv ölkələri və özəlləşdirmə strukturları haqda informasiya yerləşdiriləcək. Bu, özəlləşdirmə və dövlət mülkiyyətinin idarəetməsi sahəsinə dəstək olacaq", - Həsənov deyib.
Onun sözlərinə görə, iclasda iştirakçılar sərmayələrin cəlb edilməsi məsələlərini müzakirə edəcək, İƏT üzv ölkələrində həyata keçirilən özəlləşdirmə proqramları haqda informasiya mübadiləsi edəcəklər.
Toplantı Azərbaycanın Əmlak Məsələləri üzrə Dövlət Komitəsi tərəfindən təşkil edilib. Onun işində İƏT katibliyinin nümayəndələri, doqquz ölkənin (Türkiyə, İran, Əfqanıstan, Qazaxıstan, Qırğızıstan, Pakistan, Tacikistan, Türkmənistan və Özbəkistan) özəlləşdirmə strukturlarının ekspertləri və rəhbərlərinin başçılıq etdikləri nümayəndə heyətləri iştirak edir.
Məqalə müəllifi ilə əlaqə ünvanı: [email protected]
