Azərbaycan, Bakı, 02 iyun / Trend /
"Bazar ertəsi Bakı Fond Birjasının İdarə Heyətinin yığıncağı keçirilib və Azərbaycan İpoteka Fondunun (AİF) (emitent) təminatlı istiqrazlarının komissiya haqlarından birtərəfli qaydada azad edilməsi barədə qərar qəbul edilib", - birjanın məlumatında deyilir.
"Bununla bağlı olaraq, birja tərəfindən istiqrazların yerləşdirilməsi zamanı emitentdən komissiya tutulmayacaq", - məlumatda bildirilib.
Bu addım ipoteka istiqrazlarının bazarının formalaşdırılması və bazarda yeni məhsulların dəstəklənməsi və stimullaşdırılması məqsədilə atılıb.
Azərbaycan İpoteka Fondunun hərəsinin nominal dəyəri 1000 manat olmaqla, 55 min istiqrazının emissiya prospekti 29 may 2009-cu il tarixində dövlət qeydiyyatından keçib və istiqrazların yerləşdirilməsi Bakı Fond Birjası vasitəsilə keçiriləcək.
İpotek kreditləşməsinin başlanması ilə bağlı olaraq AİF 17 bank, 7 qiymətləndirmə şirkəti və 10 sığortaçının səlahiyyətini təsdiqləyib.
İyunun 2-nə olan rəsmi məzənnə 0,8035 AZN/USD təşkil edir.
