Azərbaycan, Bakı, 15 iyul / Trend , N.İsmayılova /
2009-cu ilin altı ayının nəticələrinə görə, Azərbaycanda orta aylıq əmək haqqı 298 manat təşkil edib ki, bu da keçən ilin analoji dövrü ilə müqayisədə 19 faiz çoxdur.
Ən yüksək əmək haqqı hasilat sənayesi, maliyyə fəaliyyəti sahəsi, əmlak əməliyyatları, icarə sahəsində və istehlakçılara xidmət, həmçinin tikinti sektorunda qeydə alınıb.
Müəssisə və təşkilat işçiləri 5,3 milyon manat məbləğində sosial maddi yardım alıblar. Əsas maddi yardım alanlar hasilat sənayesinin, enerji, qaz və su paylanması və istehsalı üzrə olan müəssisələrin, təkrar istehsal sənayesinin, nəqliyyat və rabitə sahəsinin işçiləridir.
Yanvar-iyun aylarında adambaşına düşən nominal gəlir 1126 manat təşkil edib ki, bu da 2008-ci ilin analoji dövr göstəricisindən 14,8 faiz çoxdur. Adambaşına düşən real pul gəlirləri 15,2 faiz artmaqla 1099 manat təşkil edib.
Yarımilin nəticələrinə görə, Azərbaycan əhalisinin nominal pul gəliri 10584,2 milyon manat təşkil edib ki, bu da keçənilki göstəricidən 16,2 faiz çoxdur. Bu müddət ərzində əhalinin real pul gəlirləri 16,6 faiz artaraq 9488,3 milyon manata çatıb.
Hesabat dövrü ərzində əhali şəxsi gəlirlərinin 67 faizini əmtəə əldə etməyə, 10,4 faizini vergi ödənilməsinə, sosial sığorta və məcburi üzvlük haqlarına, 22,6 faizini isə kapital yığımı və artımına yönəldib.
İyulun 15-nə cari məzənnə 0,80434 AZN/USD təşkil edir.
Məqalə müəllifi ilə əlaqə: [email protected]