Azərbaycan, Bakı, 07 avqust / Trend , müxbir N.İsmayılova /
Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti cümə günü Xaçmazda "İstehlakçı hüquqlarının qorunmasına dövlət qayğısı" mövzusunda konfrans keçirilib. Bu barədə cümə günü nazirlikdən verilən məlumatda deyilir.
Konfransda son dövrlər istehlakçı hüquqlarının qorunması ilə bağlı görülən işlər, əldə olunan nəticələr və qarşıda duran vəzifələr müzakirə olunub.
Dövlət Xidmətinin rəhbəri Zahid İsayevin sözlərinə görə, Azərbaycanda İnzibati Xətalar Məcəlləsinə əlavə və dəyişikliklər barədə qanunun mayın 17-də qüvvəyə minməsindən sonra inzibati xətalarla bağlı cərimələrin məbləği bir neçə dəfə artırılıb ki, bu da istehlakçıların hüquqlarının müdafiəsində mühüm rol oynayıb.
Onun sözlərinə görə, Dövlət Xidməti tərəfindən istehlak bazarında həyata keçirilən nəzarət tədbirləri nəticəsində 2009-cu ilin yanvar-iyun ayları ərzində istifadə müddəti ötmüş 40 tondan çox müxtəlif növ ərzaq məhsulları, o cümlədən insanların gündəlik istehlakında geniş istifadə olunan qənnadı və kolbasa məmulatları, pendir, yağ, makaron, toyuq, tomat və s. mallar, 130 kq-dan artıq uşaq qidası, 3900 ədəd uşaq oyuncağı, 2300 ədəd uşaq geyimləri satışdan çıxarılaraq məhv edilib. Monitorinqlər nəticəsində ümumi çəkisi 1000 tona yaxın olan saxta sement satışdan götürülüb.
Dövlət Xidməti ilin əvvəlindən istehlakçı hüquqlarına dair sahibkarlar və istehlakçılar üçün 9 adda 70 minə yaxın məlumat kitabçası çap edərək paylayıb.
Tədbirdə qeyd olunub ki, həyata keçirilən tədbirlər artıq öz nəticələrini verir. Belə ki, əgər bir neçə ay əvvəl ticarət obyektində orta hesabla 350-400 kq istifadə müddəti ötmüş məhsullar aşkar edilirdisə, nəzarət tədbirlərinin gücləndirilməsi nəticəsində hazırda bu rəqəm 35-40 kq-a enib və qanun pozuntusu hallarının müşahidə edildiyi ticarət obyektlərinin sayı azalıb.
Məqalə müəllifi ilə əlaqə ünvanı: [email protected]
