Azərbaycan, Bakı, 17 avqust / Trend /
Dövlət Statistika Komitəsinin məlumatına görə, yanvar-iyul aylarında Azərbaycanın nəqliyyat sektoru tərəfindən 106,3 milyon ton müxtəlif növ yük daşınıb ki, bu da ötən ilin analoji dövründən 0,6 faiz çoxdur.
Daşınan yüklərin ümumi həcminin 72,7 faizi özəl sektorun payına düşür. Yanvar-iyul ərzində yüklərin ümumi həcminin 47,9 faizi avtomobil nəqliyyatı, 34,1 faizi boru kəmərləri, 10,9 faizi dəmiryol və yeddi faizi dəniz nəqliyyatı ilə daşınıb.
Bu müddətdə sərnişin nəqliyyatı ilə 739,9 milyon nəfər daşınıb ki, bu da ötən ilin analoji dövrü ilə müqayisədə 7,4 faiz çoxdur. Sərnişindaşımada 82,3 faizlik pay özəl sektorun üzərinə düşür. Sərnişinlərin əsas hissəsi avtomobil nəqliyyatı (82,4 faiz) və metro (17 faiz) ilə daşınıb.
Dəmiryol nəqliyyatı ilə 11,6 milyon ton müxtəlif yüklər daşınıb. Ötən ilin analoji dövründə bu rəqəm 16,4 milyon ton olub.
Dəniz nəqliyyatı ilə 7,5 milyon ton müxtəlif yük daşınıb ki, bu da ötən ilin analoji dövrü ilə müqayisədə 12,5 faiz çoxdur. Daşınan yüklərin ümumi həcminin 74,1 faizi neft və neft məhsulları, qalanı isə - 25,9 faiz quru yüklərin payına düşür. Daşınan yüklərin bütün həcmi beynəlxalq əməliyyatlar daxilində həyata keçirilib. Bu dövrdə Azərbaycan limanlarına emal olunmuş yüklərin həcmi 2,9 milyon ton təşkil edib.
Avtomobil nəqliyyatı ilə 50,9 milyon ton yük daşınıb ki, bu da ötən ilin analoji dövrü ilə müqayisədə 7,1 faiz çoxdur. Sərnişindaşımanın həcmi 609,7 milyon nəfər (artım 7,1 faiz) təşkil edib. 96,5 faiz sərnişin avtobus, 3,5 faiz sərnişin minik avtomobilləri ilə daşınıb.
Metropolitenin sərnişindaşımasının həcmi 125,9 milyon nəfər təşkil edib və 9,1 faiz artım qeydə alınıb.
Hava nəqliyyatı ilə birinci rübdə 642,6 min sərnişin daşınıb. Daşımaların 9,3 faizi özəl sektorun payına düşüb.
Magistral neft kəmərləri ilə 29,2 milyon ton neft daşınıb ki, ötən ilin analoji dövründə bu rəqəm 28,7 milyon ton olub. Nəqlin 75,5 faizi "Bakı-Tbilisi-Ceyhan" kəmərinin payına düşür. Yanvar-iyul aylarında bu kəmərlə 22,1 milyon ton neft vurulub. Ötən ilin analoji dövründə bu rəqəm 21,8 milyon ton olub.
Magistral qaz kəmərləri ilə 7,1 milyard kubmetr qaz nəql edilib. Bu, ötən ilin analoji dövrü ilə müqayisədə 13,3 faiz çoxdur. 3,2 milyard kubmetr qaz "Cənubi Qafqaz" qaz kəməri ilə nəql edilib.
Azərbaycan ərazisindən Avrasiya dəhlizi üzrə 21,1 milyon ton yük və 99,4 milyon sərnişin daşınıb.