Azərbaycan, Bakı, 26 avqust / Trend , müxbir Ü.İsmayılova /
Azərbaycanın dövlət büdcəsindən 2009-cü il üçün ünvanlı sosial yardım (ÜSY) üçün 210 milyon manat ayrılıb. Bu barədə çərşənbə günü rəsmi nəşrə müsahibəsində Əmək və Əhalinin Sosial Müdafiəsi Nazirliyinin yoxsulluq və ünvanlı sosial yardım problemi üzrə siyasət şöbəsinin rəhbəri Natiq Qasımov deyib.
"Bu göstərici MDB-də ən yüksəkdir", - Qasımov deyib.
Onun sözlərinə görə, 2006-cı ildə dövlət büdcəsindən ÜSY üçün 39 milyon manat ayrılıb. 2007-ci ildə bu rəqəm 78 milyon manat, 2008-ci ildə isə 27,5 milyon manat olub.
Azərbaycanda ÜSY-nin tətbiqinə 2006-cı il iyulun 1-dən başlanılıb. 2009-cu il iyulun 1-nə olan vəziyyətə görə, ölkədə 179,5 min ailə (817,35 min nəfər) ÜSY alıb. Ölkədə bir ailənin payına düşən ÜSY-in orta aylıq məbləği 98,19 manat, bir nəfərə düşən məbləğ isə 21,56 manat təşkil edir.
ÜSY alanların ümumi sayının 77,8 faizinə müavinət ilk dəfə verilib.
Avqustun 26-na olan rəsmi məznnə 0,804 AZN/USD təşkil edir.
