Azərbaycan, Bakı, 30 sentyabr / Trend , müxbir Ü.İsmayılova/
"Qarant Sığorta"nın törəmə strukturu olan "Qarant Sığorta Agenti" QSC fəaliyyətinin üç ayı ərzində portfelini 10 min manata çatdırıb. Bu barədə çərşənbə günü "Qarant Sığorta" şirkətinin İdarə Heyətinin sədri Vaqif Həsənov bildirib.
"Şirkət fəaliyyətinin birinci ayında üç min manat toplayıb, ikinci ayda isə bu rəqəm altı min manat təşkil edib", - Həsənov deyib.
Onun sözlərinə görə, şirkətdə 20 ştat işçi işləyir və onların sayının ilin sonunadək 500-ə çatdırılması planlaşdırılır.
Həsənov həmçinin bildirib ki, şirkətə sığorta agenti işləmək məqsədi ilə 300 müraciət daxil olub və onların 80-i artıq daxili attestasiyadan keçib.
İdarə Heyəti sədrinin sözlərinə görə, sığorta agenti işləmək istəyənlər çoxdur və bununla əlaqədar olaraq şirkət özünün sığorta məktəbini yaradıb. Həmin məktəbdə sığorta işini, həmçinin polislərin satılması və insanlarla ünsiyyət qurulması öyrədilir.
"Bugünkü agentlər də şirkətdəki ştat yerlərə - minimaləmək haqqı və bonuslara iddiaçıdırlar", - Həsənov deyib.
"Qarant Sığorta" iyulda "Qarant Sığorta Agenti" QSC sığorta agentləri şirkətini yaradıb. Yeni şirkət sığorta polislərini əsasən özəl və fiziki şəxslərə satır.
Şirkətin nizamnamə kapitalı 100 manat səviyyəsində müəyyən olunub.
"Qarant Sığorta" 2007-ci ilin noyabr ayında Azərbaycanın Maliyyə Nazirliyindən sığorta fəaliyyəti üçün lisenziya əldə edib. "Qarant Sığorta" "ZQAN Holdings"-in tərkibinə daxildir. Şirkətin nizamnamə kapitalı 4 milyon manat təşkil edir. Şirkət sığortanın 18 könüllü və dörd icbari növü üzrə xidmət göstərir. Şirkətin haqları yanvar-avqust aylarında 1,96 milyon manat, ödəmələri isə 0,13 milyon manat təşkil edib.
Sentyabrın 30-na olan rəsmi məzənnə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]