Azərbaycan, Bakı, 13 noyabr / Trend , müxbir N.İsmayılova/
Qiymətli Kağızlar üzrə Dövlət Komitəsi (QKDK) Azərbaycan İpoteka Fondunun (AİF) öz kapitalı həcmində təmin edilməmiş istiqrazlar buraxmağa başlayacağını gözləyir. Bu barədə QKDK sədri Rüfət Aslanlı bildirib.
"Biz gələn il AİF-in öz kapitalı həcmində istiqrazlar buraxmağa başlayacağını gözləyirik, bu gün fond yalnız təmin edilmiş istiqrazlar buraxır", - Aslanlı deyib.
"Əgər bu gün fondun kapitalı 80 milyon manat təşkil edirsə, deməli gələn il 100 milyon manatlıq əlavə istiqraz emissiyası imkanı var. Lakin buraxılmaların hansı həcmdə olacağı AİF-in strategiyası və bazarın alıcılıq qabiliyyətindən asılı olacaq", - komitə sədri deyib.
Onun sözlərinə görə, 55 milyon manat həcmində qeydə alınmış bütün təmin edilməmiş istiqraz emissiyasının yerləşdirilməsi realdır.
Hazırda fond 44 milyon manatlıq 8 tranş həyata keçirir və artıq bu istiqrazların yerləşdirilməsi üzrə təkrar bazarda fəaliyyət göstərir. "Onların yerləşdirilməsi tələbatın yarandığı ölçü üzrə aparılır, əks halda vəsaitlərin zərurət olmadan cəlb edilməsi fondun gəlirlərinə və kredit imkanlarına mənfi təsir edə bilər", - Aslanlı deyib.
AİF istiqrazlarının yerləşdirilməsinə 16 iyun 2009-cu il tarixində başlanılıb və hərraca bu günədək 41 milyon manat həcmində istiqraz yerləşdirilib.
Emissiyanın ümumi həcmi 55 milyon manat, bir istiqrazın nominal dəyəri isə min manat təşkil edir.
Noyabrın 13-nə olan rəsmi məzənnə 0,803 AZN/USD təşkil edir.
Məqalə müəllifi ilə əlaqə ünvanı: [email protected]
