Azərbaycan, Bakı, 20 noyabr / Trend , müxbir Ü.İsmayılova/
Azərbaycanın Standartlaşdırma, Metrologiya və Patent üzrə Dövlət Komitəsində standartlaşdırma, metrologiya, uyğunluğun qiymətləndirilməsi və akkreditasiyası sahələrində imkanların gücləndirilməsi üzrə Tvinning layihəsinin rəhbər komitəsinin bu il üçün son iclası keçirilib. Avropa Qonşuluq Siyasəti çərçivəsində həyata keçirilən layihənin məqsədi Azərbaycanda keyfiyyət infrastrukturu sisteminin Avropa Birliyinin tələblərinə uyğunlaşdırılmasıdır. Bu barədə Dövlət Komitəsinin cümə axşamı yayılan məlumatında deyilir.
"Avropa ekspertləri ilə birgə 3 ay ərzində keyfiyyət infrastrukturunu əhatə edən çərçivə layihəsi üzərində işlər həyata keçirilib", - Standartlaşdırma, Metrologiya və Patent üzrə Dövlət Komitəsinin Texniki tənzimləmə və standartlaşdırma şöbəsinin müdiri Sabiq Abdullayev bildirib.
O, həmçinin bildirib ki, hazırda Standartlaşdırma, Metrologiya və Patent üzrə Dövlət Komitəsində "Akkreditasiya haqqında" Qanun layihəsi üzərində iş gedir. Bundan başqa, "Ölçmələrin vəhdətinin təmin edilməsi haqqında" Qanunun təkmilləşdirilməsi məqsədilə əlavə və dəyişikliklər hazırlanır. "Texniki tənzimləmə və uyğunluğun qiymətləndirilməsi haqqında" Qanun layihəsinin Milli Məclisdə müzakirəsinə başlanacağı gözlənilir.
Ötən 3 ay ərzində əldə olunmuş nailiyyətlərdən biri isə İSO 17025 - kalibrləmə laboratoriyalarına ümumi tələblər standartının Azərbaycan Respublikasının standartı kimi qəbul edilməsidir. Azərbaycan Standartları İnstitutunun əsasnaməsi və strukturu da hazırlanıb.
Tvinning layihəsi çərçivəsində alınacaq metroloji avadanlıqların Azərbaycana gətirilməsi, quraşdırılması prosesi gələn ilin 15 aprel tarixinə kimi yekunlaşacaq.
İclasın sonunda 3 aylıq hesabat təsdiqlənib.
Məqalə müəllifi ilə əlaqə ünvanı: [email protected]
