Azərbaycan, Bakı, 10 aprel /Trend/
Avtomobil və dəmir yollarının təhlükəsizliyi zonasında qanunsuz tikililərin müəyyən olunması üçün Azərbaycan Nazirlər Kabineti tərəfindən yaradılan komissiya qanunsuz tikililərin sayının 954 olduğunu (881 yaşayış, 73 qeyri-yaşayış) müəyyən edib. Bu barədə cümə günü Azərbaycan Nəqliyyat Nazirliyinin yaydığı məlumatda bildirilir.
Qanunsuz tikililərin çoxu dəmiryol təhlükəsizliyi zonasına düşüb və 883 ədəd təşkil edib. Avtomobil yollarının payına 71 qanunsuz tikinti düşüb.
Birinci mərhələdə komissiya tərəfindən avtomobil və dəmir yollarının təhlükəsizliyi zonasında qanunsuz tikililərin ümumi sayı 5 minə yaxın göstərilib. Bunun 2 mini avtomobil, 3 mini dəmir yollarının payına düşüb.
Bakıda, o cümlədən Abşeron rayonunda, həmçinin Gəncə və Sumqayıtda keçirilmiş reydlərin nəticələri göstərib ki, Əhmədli, Sumqayıt, Bakı yük, Xırdalan, Keşlə, Biləcəri, Keşlə magistralı - 2-ci blok post-BNEZ-Əhmədli, Keşlə-2-ci blok post-Böyük Şor stansiyalarını birləşdirən 23 dalanlı dəmiryol ərazisində qanunsuz tikililər qatarların hərəkəti və manevri, manevr briqadaları, həmçinin sakinlərin özləri üçün təhlükə törədir.
14 istiqamət üzrə dalanlı dəmiryollarda vətəndaşlar tərəfindən evlərin və digər tikililərin inşası onların işləməməsinə gətirib çıxarır. Bu isə öz növbəsində həmin stansiyalara gələn yüklərin boşaldılmasına ehtiyac yaradır.
