Аzərbaycan, Bakı , 20 may /Trend, müxbir N.İsmayılova/
Azərbaycanda qeyri-neft sektoru məhsullarının ixracatının stimullaşdırılması metodları və konkret istiqamətləri müəyyən olunub, - cümə axşamı "Azərbaycan ixracatının inkişaf istiqamətləri" seminarında ölkənin İqtisadi İnkişaf Nazirliyi yanında İqtisadi İslahatlar Üzrə Elmi-Tədqiqat İnstitutunun direktoru Vilayət Vəliyev bildirib.
"İnstitut tərəfindən aparılan tədqiqatlara görə, qeyri-neft sektorunda ən aparıcı istiqamətlər kənd təsərrüfatı, turizm, yüngül, yeyinti sənayesi və maşınqayırma sahəsidir", - Vəliyev deyib.
Onun sözlərinə görə, ölkədə keçirilən stimullaşdırıcı tədbirlər qanunvericilik bazasının təkmilləşdirilməsi, ixracat siyasətinin koordinasiyası, ixracatın maliyyələşdirilməsi və ixrac olunan məhsulların istehsalını yaxşılaşdırmağa yönəldilib.
Azərbaycan Respublikasının Prezidenti İlham Əliyev 14 may 2010-cu ildə "Azərbaycanın idxal-ixrac əməliyyatlarının nizama salınması qaydalarının təkmilləşdirilməsi sahəsində əlavə tədbirlər haqqında" fərman imzalayıb ki, bu da idxal-ixrac əməliyyatlarının bütövlükdə bərabərliyi, sahibkarlığa dövlət dəstəyinin gücləndirilməsi və ölkənin regionlarında sosial-iqtisadi inkişafın sürətlədirilməsini təmin edəcək.