Azərbaycan, Bakı, 18 iyun /Trend, müxbir N.İsmayılova/
Azərbaycan Mərkəzi Bankının (AMB) dərc etdirdiyi ödəniş balansına görə, 2010-cu ilin birinci rübündə birbaşa dövlət və dövlət zəmanətli kreditlərin, özəl sektorun cəlb etdiyi kredit və ssudaların, depozitlərin və digər kapital qoyuluşlarının xüsusi çəkisi xarici investisiyaların ümumi həcminin 62,2 faizini təşkil edib. Onların ümumi həcmi 1161,6 milyon dollar təşkil edib ki, bu da 2009-cu ilin birinci rübü üzrə göstəricidən 3,6 dəfə çoxdur.
Hesabat dövründə dövlət zəmanəti altında 13,3 faiz (154,7 milyon dollar) kredit cəlb olunub.
Zəmanətsiz kreditlərin həcmi 732,9 milyon dollar olub. Onun 527,4 milyon dolları bankların, 123 milyon dolları qeyri-neft sektorunun və 82,5 milyon dolları digər müəssisə və firmaların payına düşüb.
Birbaşa xarici investisiyaların ümumi həcmi 704,7 milyon dollar təşkil edib. Bu investisiyaların strukturunda qeyri-neft sektorunun xüsusi çəkisi 84,6 faiz olub. Bu vəsait hazırda ARDNŞ-in (Dövlət Neft Şirkəti) Gürcüstanda və Türkiyədə həyata keçirilən layihələrinin maliyyələşdirilməsinə yönəldilib.
Qeyri-neft sektoruna cəlb olunan birbaşa xarici investisiyaların həcmi 108,3 milyon dollara çatıb ki, bu da investisiyaların ümumi həcminin 15,4 faizi qədərdir.