Azərbaycan, Bakı, 2 avqust /Trend/
Bakıda avqustun 3-də Bakı-Tbilisi-Qars dəmir yolunun yaradılmsı layihəsi çərçivəsində Məsləhət Şurasının ikinci iclası keçiriləcək. Bu barədə Azərbaycan Nəqliyyat Nazirliyinin yaydığı məlumatda deyilir.
İclasda Azərbaycanın nəqliyyat naziri Ziya Məmmədov, Gürcüstanın regional inkişaf və infrastruktur naziri Ramaz Nikolaşvili və Türkiyənin nəqliyyat naziri Binali Yıldırımın başçılıq etdikləri nümayəndə heyətləri iştirak edəcəklər. İclasda Qars-Axalkalaki dəmir yolunun layihə və inşaat işləri, Türkiyə ərazisində vaqonların təkərlərinin dəyişdirilməsi və digər məsələlər müzakirə olunacaq.
Həmçinin, Bakıda bu layihə çərçivəsində Əlaqələndirmə Şurasının 9-cu iclası da keçiriləcək. İclas zamanı layihənin reallaşdırılmasının bir sıra aspektləri, Gürcüstan ərazisində dəmir yolunun yenidən qurulması layihəsinin təsdiqlənməsi, Kartsaxi stansiyasının tikinti layihəsinin təsdiqlənməsi, Axalkalaki stansiyasının tikinti layihəsinin reallaşdırılmasının gedişi, Marabda-Kartsaxi dəmir yolunun büdcəsinə dəyişikliklərin edilməsi və digər məsələlər müzakirə olunacaq.
