Azərbaycan, Bakı, 11 avqust /Trend, müxbir E.İsmayılov/
İki ildən sonra Bakı-Şamaxı-Muğanlı avtomobil yolu yenilənmiş şəkildə istismara veriləcək. Bu barədə çərşənbə günü nəqliyyat naziri Ziya Məmmədov deyib. Bu gün Bakıda Azərbaycan Nəqliyyat Nazirliyi və Dünya Bankı arasında bu yolun yenidən qurulması üzrə işlərin maliyyələşdirilməsi haqqında kredit sazişi imzalanıb.
Məmmədovun sözlərinə görə, nəzərdə tutulan işlər çərçivəsində ikizolaqlı yolun dördzolaqlıya genişləndirilməsi və beləliklə də onun ikinci texniki kateqoriyadan birinci kateqoriyaya keçirilməsi planlaşdırılıb.
"İki ildən sonra yol artıq yenilənmiş şəkildə istismar olunacaq", - Məmmədov qeyd edib.
Bankın bu layihənin maliyyələşdirməsinə ayırdığı kredit resurslarından 70 milyon dollar 2010-cu il maliyyə ilində Azərbaycan üçün Beynəlxalq İnkişaf Assosiasiyasının (BİA DB qrupuna daxildir) kvotaları hesabına güzəştli şərtlərlə nəzərdə tutulub, 171,6 milyon dollar Beynəlxalq Yenidənqurma və İnkişaf Bankının (BYİB) xətti ilə ayrılacaq. Layihənin ümumi dəyəri 356,15 milyon dollar təşkil edir. Maliyyələşmənin yerdə qalan digər hissəsi - 184,55 milyon dollar, müvafiq olaraq, layihədə dövlətin iştirak payı sayəsində həyata keçiriləcək.
BİA-nın xətti ilə kredit resursları 10 illik güzəştli dövr olmaqla 20 illliyə, BYİB isə ödənişdən dördillik möhlətlə 17 illiyə ayrılıb.
Bakı-Şamaxı-Muğan yolunun uzunluğu 122 kilometr təşkil edir ki, onun da 101 kilometri müzakirə olunan layihə çərçivəsində tikiləcək, yerdə qalan hissə isə artıq tikilib.
