Azərbaycan, Bakı, 19 avqust /Trend, müxbir N.İsmayılova/
İlin birinci yarısında Azərbaycan banklarının resurs bazalarının formalaşmasında əsas mənbə rolunu depozitlər qoruyub. Bu barədə Mərkəzi Bankın maliyyə sabitliyi hesabatında deyilir.
İlin başlanğıcı ilə müqayisədə bankların ümumi depozit bazası 57,2 milyon manat artaraq 4,7 milyard manat olub. Ümumi öhdəlik strukturunda depozitlərin payı 46,5 faiz təşkil edib.
İlin birinci yarısında hüquqi şəxslərin depozit dinamikasında durğunluq müşahidə olunub. Onun həcmi 7,4 faiz azalaraq 2,1 milyard manat təşkil edib. İllik hesablamada depozitlər 22 faiz artıb və bankların ümumi öhdəliklərinin həcminin 21,2 faizini təşkil edib.
Hesabat dövründə əhalinin əmanət qoyuluşları 9,8 faiz artaraq 2,5 milyard manata çatıb, onların ümumi öhdəliklər həcmində payı 25,3 faiz təşkil edib. Ötən illə müqayisədə artım tempi 32,4 faizə çatıb.
Qoyuluşlar üzrə depozit portfelinin strukturunun yaxşılaşdırılması ölkənin bank sisteminə inamın artmasını göstərir. Depozitlərin ümumi həcmində uzunmüddətli depozitlərin ümumi payı 60-64 faiz olub. 2009-cu ilin birinci yarısında bu göstərici 55 faiz təşkil edib.
Bundan başqa, əhalinin uzunmüddətli əmanət qoyuluşlarında illik hesablamada 34 faiz, cari ildə isə 12,4 faiz artım müşahidə olunaraq, 2 milyard manat səviyyəsinə çatıb. Əhalinin uzunmüddətli əmanət qoyuluşları ilin birinci yarısı ərzində əmanətlərin ümumi qoyuluş həcmində 78-81 faizə çatıb.
Əmanət qoyuluşlarının ümumi həcmində 33,2 faiz bir il müddətinə olan əmanətlərin payına (32,3 faiz ilin əvvəli müqabilində) düşüb. İlin birinci yarısında banklararası öhdəliklər 14 faiz və 238,4 milyon manat artaraq, iyulun 1-nə iki milyard manat və ya öhdəliklərin ümumi həcminin 19,6 faizini təşkil edib.
2010-cu ilin birinci yarısında qeyri-rezidentlərdən cəlb edilən öhdəliklərin xalis artımı 245 milyon manat olub.
Likvidlik aktivlərinin ümumi aktivlərin həcminə nisbəti bank sistemində likvidlik risklərinin idarə edilməsinin adekvatlığı təsdiq edir. İlin birinci yarısının sonuna onların ümumi aktiv həcmində həcmi 21,3 faiz, depozitlərə nisbətdə isə 56,3 faiz təşkil edib. Likvidlik aktivlərinin təhlili göstərib ki, onlar qənaətbəxş səviyyədədir.
Avqustun 19-na rəsmi məzənnə 0,8038 AZN/USD təşkil edir.
