Azərbaycan, Bakı, 29 sentyabr /Trend, müxbir İ.Xəlilova/
İqtisadi əməkdaşlıq üzrə Azərbaycan-ABŞ hökumətlərarası komissiyasının növbəti iclasının keçirilməsinin yubanması Amerika tərəfdən həmsədrin təyin edilməməsi ilə əlaqədardır. Bu barədə çərşənbə günü Azərbaycanın maliyyə naziri Samir Şərifov deyib. Son iclas iki il bundan əvvəl keçirilib.
"Azərbaycan tərəfdən komissiyaya maliyyə naziri başçılıq edir, Amerika tərəfdən isə əvvəllər bu funksiyanı ABŞ dövlət katibinin müavini Daniel Sallivan yerinə yetirib, lakin onun səlahiyyət müddəti başa çatıb, yeni amerikalı həmsədr isə hələ ki təyin olunmayıb", - Şərifov qeyd edib.
Onun sözlərinə görə, yeni həmsədr təyin olunduqdan sonra İqtisadi əməkdaşlıq üzrə Azərbaycan-ABŞ komissiyasının işində fəallığın artacağını gözləmək olar.
Azərbaycan-ABŞ komissiyasının ötən ikinci iclasının əsas mövzusu makroiqtisadi siyasət və Azərbaycanın inkişafı, ticarət və investisiya mühiti, iqtisadi islahatlar və ikitərəfli iqtisadi inkişaf üçün sahələrin genişləndirilməsi olub.
Hazırda ABŞ-ın Ticarət və İnkişaf Agentliyi (USTDA) Azərbaycanda texniki yardım xarakterli bəzi layihələri maliyyələşdirir. ABŞ istəyir ki, belə layihələrin maliyyələşməsinin bir qismini Azərbaycan tərəfi öz üzərinə götürsün. Söhbət birgə maliyyələşmədən gedir.
Bundan əvvəl USAID-in Azərbaycan üzrə koordinatoru Skot Teylor birgə maliyyələşmə üçün bu istiqamətlərdə dörd layihənin hazırlanması barədə danışıb: ticarət və investisiya, fiskal islahatlar, özəl sektorda rəqabət və maliyyə sabitliyi.
İqtisadi əməkdaşlıq üzrə Azərbaycan-ABŞ hökumətlərarası komissiyasının ilk iclası 2007-ci il fevralın 7-də Bakıda keçirilib. Bundan əvvəl isə iqtisadi əməkdaşlıq üzrə birgə işçi qrupunun 10 iclası (hər il iki belə iclas keçirilib) olub.