Azərbaycan, Bakı, 10 dekabr /Trend, müxbir İ.Xəlilova/
Cümə günü parlamentin İqtisadi siyasət, Hüquq siyasəti və dövlət quruculuğu komitələri "Yol nişanları və siqnalları haqqında" üç beynəlxalq konvensiyaya qoşulmaq haqqında qanun layihələrinin təsdiq olunmaq üçün Azərbaycanın Milli Məclisinə təqdim etməyi tövsiyə ediblər.
Birinci konvensiya 1968-ci ildə Vyanada, ona əlavə kimi qəbul olunan qalan iki Avropa konvensiyası isə 1971 və 1972-ci illərdə imzalanıb.
"Bu konvensiyaların təsdiq olunmasına zərurət onunla bağlıdır ki, Azərbaycan ötən əsrin 90-cı illərin əvvəllərindən etibarən müxtəlif istiqamətlərdə beynəlxalq standartlara uyğun şəkildə avtomobil magistrallarının inşası üzrə genişmiqyaslı tədbirlərin həyata keçirilməsinə başlayıb", - iclas zamanı qeyd olunub.
Konvensiya çərçivəsində ölkə yol nişanları və siqnalların Avropa standartlarının tələblərinə uyğunlaşdırılması üzrə üzərinə öhdəlik götürür.
"Azəryolservis" ASC-nin direktoru Cavid Qurbanovun sözlərinə görə, Azərbaycanda yol nişanları və siqnalları üzrə ciddi dəyişikliklər gözlənilmir.
"Azərbaycan ərazisində avtomobil yollarının təkmilləşdirilməsi ilə əlaqədar 250 min yeni yol nişanının quraşdırılması tələb olunur. Cəmi yeddi nişan qrupu - xəbərdar edən, qadağan edən, xidməti, istiqamətləndirici, bu nişanlara əlavə və b. var", - Qurbanov deyib.
