Azərbaycan, Bakı, 28 dekabr /Trend, müxbir Ü.İsmayılova/
Azərbaycanda daşınmaz əmlakın icbari sığortasını tətbiq etmək hələ ki tezdir. "MBA Group" Konsaltinq Şirkətinin baş direktoru Nüsrət İbrahimov belə düşünür.
"Azərbaycanda daşınmaz əmlakın icbari sığortasının tətbiqi ölkədə bütün obyektlərin inventarlaşdırılması üzrə işlər başa çatandan sonra aktual ola bilər", - İbrahimov qeyd edib.
Onun sözlərinə görə, ilk növbədə daşınmaz əmlakın, eləcə də torpaq sahələrinin bütün obyektlərinin inventarlaşdırılması aparılmalıdır, bundan sonra bütün informasiya elektron kartlara köçürülməlidir. Belə məlumat bazası yaradıldıqdan sonra hökumət bəzi daşınmaz əmlak obyektlərinin sökülməsi və ya qeydiyyata alınması barədə qərar qəbul etməlidir.
"Yalnız bu mühüm işlər başa çatdıqdan sonra Azərbaycanda daşınmaz əmlakın icbari sığortası tətbiq edilə bilər", - İbrahimov vurğulayıb.
Bundan əvvəl Azərbaycan Maliyyə Nazirliyinin Dövlət Sığorta Nəzarəti Xidmətinin rəhbəri Namiq Xəlilov bildirmişdi ki, Azərbaycanda daşınmaz əmlakın icbari sığortası tətbiq ediləcək.
"Öz daşınmaz əmlakını sığortalamayan şəxs hətta təbii fəlakətin baş verəcəyi halda belə, dövlətdən kompensasiya almayacaq", - Xəlilov deyib.
Onun sözlərinə görə, daşınmaz əmlakın icbari sığortası "İcbari sığorta haqqında" qanun layihəsində nəzərdə tutulub. Həmin sənədə görə, mülkiyyətçilər daşınmaz əmlakın sayından asılı olmayaraq onu icbari qaydada sığortalamalıdırlar.
Xəlilov bildirib ki, daşınmaz əmlakın icbari sığortası dünyanın bir çox ölkələrində tətbiq olunur. Azərbaycandakı sığorta şirkətləri də ölkədə sığorta biznesinin inkişafı, eləcə də təbii fəlakətlər zamanı kompensasiyaların təmin edilməsi məqsədilə daşınmaz əmlakın icbari sığortasının tətbiqini təklif edirlər.
"Daşınmaz əmlakın sığortası sığortanın ən ucuz növlərindən biridir. Çünki yerli mütəxəssislərin hesablamalarına görə, bütün risklərdən sığortalanmaq üçün əmlakın dəyərinin cəmi 0,1 faizinin ödənilməsi kifayətdir", - Xəlilov bildirib.
Bu sahədə nəzarət məsələsinə gəldikdə, Xəlilov deyib ki, nəzarətin növlərindən biri əmlakın alqı-satqısı zamanı sığortanın tələb edilməsidir. Lakin bu metod heç də həmişə özünü doğrultmur, çünki bəzən adamlar bütün ömürləri boyu bir mənzildə yaşayırlar və onun alqı-satqısını həyata keçirmirlər. Nəzarətin bu növünün səmərəsizliyi üzündən başqa bir üsul tətbiq etmək mümkündür. Bu da əmlakını sığortalamayan mülkiyyətçilərə təbii fəlakətlər zamanı dövlət tərəfindən kompensasiyanın verilməməsidir.
