Azərbaycan, Bakı, 14 fevral /Trend, müxbir İ.Xəlilova/
Özəl Sektorun İnkişafı üzrə İslam Korporasiyası (ICD - İslam İnkişaf Bankı qrupuna daxildir) Azərbaycanın sığorta bazarına daxilolma imkanlarını öyrənir. Bu barədə bazar ertəsi İİB-nin Azərbaycandakı nümayəndəsi Tamerlan Tağıyev deyib.
"Azərbaycanın sığorta bazarının tədqiqi davam etdiyinə görə bunun hansı şəkildə - bazarda fəaliyyət göstərən şirkətin alınması və ya yeni islam sığorta şirkətinin (təkafül) yaradılması yolu ilə baş verəcəyini demək çətindir", - Tağıyev qeyd edib.
"Bizim sığorta şirkətimiz öz fəaliyyətini islam prinsiplərinə uyğun həyata keçirəcək. İlkin olaraq biz ölkənin sığorta bazarındakı vəziyyəti, daxilolma şərtlərini, sığorta sektorunu tənzimləyən qüvvədə olan qanunvericiliyi öyrənmək niyyətindəyik. Bunun üçün xüsusi şirkəti cəlb etmək lazımdır, bundan sonra isə biz əsaslı qərar hazırlayacağıq", - bundan əvvəl ICD-nin baş direktoru Xalid əl-Abudi Trend-ə demişdi.
"Azərbaycanın sığorta sahəsindəki qanunvericiliyi ölkədə islam sığorta şirkətinin yaradılmasına imkan verir", - bazar ertəsi Trend-ə Maliyyə Nazirliyi nəzdində Dövlət Sığorta Nəzarəti Xidmətinin sədr müavini Mahir Abdullayev deyib.
"Milli qanunvericiliyə görə, bazara daxil olmaq məqsədilə lisenziya almaq üçün müvafiq tələbləri yerinə yetirmək lazımdır, - Abdullayev bildirib. - Tələblər həm sığorta bazarının ənənəvi iştirakçıları, həm də islam sığortası üçün eynidir".
Təkafül və ya islam sığortası - qrup iştirakçıları arasında risklərin kollektiv və ya könüllü bölüşdürülməsini nəzərdə tutan qarşılıqlı yardım (təavun) və könüllü ödənişlər (təbərru) prinsiplərinə əsaslanan sistemdir. Təkafül islam hüququ prinsiplərinə uyğun olan sığorta formasıdır. Ərəb dilindən tərcümədə "zəmanətin qarşılıqlı verilməsi" deməkdir.
Təkafül sistemində sığortaçılar qarşılıqlı maliyyə yardımı vermək üçün öz vəsaitləri hesabına xüsusi sığorta fondu yaradırlar. İştirakçılardan hansısa müqavilədə göstərilən neqativ hadisə ilə qarşılaşdıqda fondun vəsaitləri hesabına ona sığorta vəsaitləri ödənilir. Beləliklə də təkafül fondunun bütün risk və itkiləri onun iştirakçıları arasında bölünür. Fondda defisit yarandıqda onun ödənilməsinə görə həmrəylik məsuliyyətini öz vəsaitləri hesabına (əlavə) bütün iştirakçılar daşıyır.
İslam sığortası islam hüququnun müddəlarına ziddiyət təşkil etməməklə faktiki ənənəvi funksiyaları yerinə yetirir. Həm islam, həm də ənənəvi sığorta şirkətləri çətin maliyyə vəziyyətinə düşən şəxslərə maliyyə yardımı göstərmək üçün alətdir. İslam sığorta bazarının dünyada daha çox inkişaf etmiş olduğu ölkələrdə təkafül təşkilatlarının müştərilərinin çox hissəsi qeyri-müsəlmanlardır. İslam sığortasının məhsulları Avropada, xüsusilə də Böyük Britaniyada çox populyardır. Hazırda Avropa və Mərkəzi Asiya ölkələri islam maliyyələşdirilməsi mütəxəssisləri tərəfindən islam sığortasının inkişafı baxımından daha perspektivli hesab edilir.
Özəl Sektorun İnkişafı üzrə İslam Korporasiyası İİB-nin Direktorlar Şurası tərəfindən 1999-cu ildə Ciddədə keçirilən bankların 24-cü ənənəvi görüşündə təsis edilib. ICD-nin baş ofisi Ciddədə (Səudiyyə Ərəbistanı) yerləşir.
Özəl Sektorun İnkişafı üzrə İslam Korporasiyasının Azərbaycanda törəmə şirkətləri var. Bunlar Caspian International Investment Company (CIIC) və lizinq şirkəti "Ansar Leasing"dir.
Azərbaycanda 27 sığorta və bir təkrar sığorta şirkəti fəaliyyət göstərir.
