Azərbaycan, Bakı, 6 aprel /Trend, müxbir N.İsmayılova/
Azərbaycanda yeganə qızıl istehsalçısı "Anglo Asian Mining plc" şirkəti bu ilin birinci rübü ərzində "Gədəbəy" qızıl yatağından hasil edilən 14 028 unsiya qızıl istehsal edib. Bu barədə şirkətin çərşənbə günü yaydığı məlumatda deyilir.
"Mən şirkətin irəliləyişindən çox razıyam və bizim istehsal üzrə məqsədimizin ilin sonuna 60 min unsiya qızıl olacağına inanıram. Bununla yanaşı, hesabat dövrü ərzində qızılın qiyməti orta hesabla bir unsiya üçün 1385 dollar təşkil edib", - şirkətin icraçı direktoru Rza Vəziri bildirib.
Son aylar ərzində Gədəbəydə hasilat üçün əlverişsiz olan hava şəraiti 2011-ci ilin birinci rübündə 2010-cu ilin dördüncü rübü ilə müqayisədə istehsalın azalmasına səbəb olub. Bununla yanaşı, hesabat dövrü ərzində ötən ilin analoji dövründə istehsal olunan 13 660 unsiya ilə müqayisədə 3 faiz çox məhsul istehsal edilib. "Anglo Asian" 2011-ci ilin ilk üç ayı ərzində 11 269 unsiya qızılın satışını bir unsiya üçün orta hesabla 1385 dollara başa vurub.
Rüb ərzində şirkət yuyulmaya orta qızıl tutumu 3,32 qram/ton (2010-cu ilin dördüncü rübündə orta tutumu 4,32 qram/ton olan 240 208 quru filiz) olan 208 min quru filiz verib.
"Anglo Asian Mining plc" şirkəti 1997-ci ilin avqustunda Azərbaycan hökuməti ilə imzalanmış müqaviləyə əsasən, Azərbaycanın cənub-qərbindəki altı yataqda - Gədəbəy, Ordubad, Qoşa Bulaq, Qızıl Bulaq, Vejnəli və Söyüdlüdə işləmək hüququna malikdir.
Azərbaycan hökuməti ilə Azərbaycan Beynəlxalq Mədən Əməliyyatı Şirkəti arasında 30 il müddətinə imzalanan hasilatın pay bölgüsü haqqında müqavilədə Azərbaycanın pay hissəsi 51 faiz, Böyük Britaniyanın "Anglo-Asian Mining plc" şirkətinin pay hissəsi isə 49 faizdir.
Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.
İlk qızıl və gümüş 2009-cu ilin mayında "Gədəbəy" yatağından hasil edilib. Ümumilikdə 2015-ci ilədək "Gədəbəy" yatağından 300 min unsiya qızılın hasil edilməsi planlaşdırılır.