Azərbaycan, Bakı, 1 iyul /Trend, müxbir A.Axundov/
Azərbaycanın sığorta şirkəti "AZAL Sığorta" rebrendinq edib. Bu barədə cümə günü Trend-ə şirkətin idarə heyətinin sədri Niyazi Səfərli bildirib.
Bundan sonra şirkət "İpək Yolu Sığorta Şirkəti" adı ilə fəaliyyət göstərəcək.
Onun sözlərinə görə, şirkət artıq rebrendinqlə əlaqədar Vergilər Nazirliyndə dövlət qeydiyyatından keçib.
"Yaxın vaxtlarda biz Maliyyə Nazirliyi yanında Dövlət Sığorta Nəzarəti Xidmətində sığorta fəaliyyəti üzrə lisenziyanın yenilənəcəyini gözləyirik", - Səfərov bildirib.
İyulun 7-8-də Bakıda keçiriləcək II Azərbaycan Beynəlxalq Sığorta Forumunda şirkətin yeni ad altında təqdimatının keçirilməsi planlaşdırılır.
Yanvar-mayda "AZAL Sığorta" 7,79 milyon manat məbləğində sığorta mükafatı yığaraq Azərbaycanın sığorta bazarında ikinci nəticəni göstərib, 2,77 milyon manat məbləğində ödəniş həyata keçirib.
Hava nəqliyyatının sığortası üzrə ixtisaslaşan "AZAL Sigorta" SŞ 1995-ci ildə yaradılıb. 2010-cu il noyabrın 12-də Maliyyə Nazirliyi şirkətə müddətsiz lisenziya verib.
Şirkətin təsisçisi "Azərbaycan Hava Yolları" QSC-dir.
İyulun 1-nə olan rəsmi məzənnə 0,7867 AZN/USD təşkil edir.
