Azərbaycan, Bakı, 13 sentyabr /Trend, müxbir A.Axundov/
Azərbaycan Sığortaçılar Assosiasiyasının yeni nizamnaməsi bu ilin sonunadək qəbul edilə bilər. Bu barədə Trend-ə çərşənbə axşamı ASA-nın icraçı direktoru Azər Əliyev deyib.
Onun sözlərinə görə, assosiasiyanın nəzarət şurasının bugünkü iclasında ASA-nın hüquq komitəsi tərəfindən 15 sentyabr - 15 oktyabr arasında nizamnamənin layihəsini hazırlamaq tapşırılıb.
Əliyev bildirib ki, layihə hazırlanandan sonra baxılması üçün bütün sığorta şirkətlərinə göndəriləcək.
"Bütün detalların işlənməsindən sonra final variantı hazırlanacaq və nizamnamə ilin sonunadək qəbul oluna bilər", - o deyib.
İcraçı direktorun sözlərinə görə, nizamnamənin əsas konseptual istiqamətləri hazırdır.
Azərbaycanda 27 sığorta və bir təkrar sığorta şirkəti var. Onların hamısı ASA-nın üzvüdür.
