Azərbaycan, Bakı, 19 sentyabr /Trend, müxbir A.Axundov/
Azərbaycan Dövlət Gömrük Komitəsi (DGK) səkkiz ay ərzində Azərbaycanın dünyanın 146 ölkəsi ilə apardığı xarici ticarət əməliyyatlarının yekununu açıqlayıb. Bu barədə Trend-ə DGK-dan məlumat verilib.
Ölkənin əmtəə dövriyyəsinin ümumi həcmi 23,661 milyard dollar təşkil edib ki, bu da ötən ilin göstrəricisindən 31,66 faiz çoxdur.
Xarici ticarət dövriyyəsində 11,935 milyard dollar həcmində müsbət saldo yaranıb.
Həmin dövr ərzində xarici ticarət əməliyyatlarında 6350 min hüquqi və fiziki şəxs fəaliyyət göstərib ki, onlardan 3294-i hüquqi, 3056-i isə fiziki şəxsdir.
İlin səkkiz ayı ərzində ixrac əməliyyatları 17,798 milyard dollar təşkil edərək 2010-ci ilin analoji dövrü ilə müqayisədə 27,59 faiz artıb.
İxrac əməliyyatlarında dövlət sektorunun payı 17,003 milyard dollar, özəl sektorun payı 0,701 milyon dollar, fiziki şəxslərin payı isə 94,48 milyon dollar təşkil edib.
Yanvar-avqust ayları ərzində idxal 5,863 milyard dollar təşkil edib ki, bu da ötən ilin analoji dövr göstəricisi ilə müqayisədə 45,76 faiz çoxdur.
İdxal əməliyyatlarında dövlət sektorunun payı 2,09 milyard dollar, özəl sektorun payı 3,49 milyard dollar, fiziki şəxslərin payı isə 279,48 milyon dollar təşkil edib.
Səkkiz ay ərzində Azərbaycandan 1751 növ məhsul ixrac edilib, ölkəyə isə 5657 növ məhsul gətirilib.
