Azərbaycan, Bakı, 28 sentyabr /Trend, müxbir N.İsmayılova/
Azərbaycan Beynəlxalq Bankının (ABB) özəlləşdirilməsi üzrə məsləhətçisi olan PriceWaterhouseCoopers Audit Azerbaycan, Salans UK Limited, Rothschild & CIE konsorsiumu ilin sonuna kimi bu məsələ ilə bağlı ilkin təklif təqdim edəcək. Bu barədə çərşənbə günü Trend-ə maliyyə nazirinin müavini Azər Bayramov bildirib.
"Biz, həmçinin bankın kapitallaşması məsələsi üzrə məsləhətçilərdən təkliflər gözləyirik. Bundan sonra qarşılıqlı diskussiyalar aparılacaq, çünki hesab edirik ki, bankın özəlləşdirilməsi məsələsində tələsməyə dəyməz", - Bayramov deyib.
Bir müddət əvvəl ABB-nin idarə heyətinin sədri Cahangir Hacıyevin Trend-ə dediyi kimi, Azərbaycan Beynəlxalq Bankı qismən və ya səhmlərin əlavə emissiyası, IPO və digər üsullar vasitəsilə tam özəlləşdiriləcək.
İyunda özəlləşdirmə prosesi və ABB-nin nizamlanamə kapitalında dövlətin payının azaldılması (dövlətsizləşdirmə) prosesi üzrə xidmətlərin göstərilməsi ilə bağlı PriceWaterhouseCoopers Audit Azerbaycan, Salans UK Limited, Rothschild & CIE konsorsiumunun Azərbaycan filialı məsləhətçi seçilib.
ABB yarıdövlət bankıdır və onun əsas səhmdarı hazırda Azərbaycan hökumətidir. O, səhmlərin 50,2 faizinə sahibdir. Qalan 49,8 faiz pay isə fiziki və hüquqi şəxslər arasında bölüşdürülüb.
Sentyabrın 28-nə olan rəsmi məzənnə 0,7869 AZN/USD təşkil edir.
