Azərbaycan, Bakı, 6 oktyabr /Trend, müxbir N.İsmayılova/
Növbəti on ildə Azərbaycanın strateji valyuta ehtiyatları 100 milyard dollara çata bilər. Trend-in məlumatına görə, bu barədə cümə axşamı Bakıda "Sənayeçilər və sahibkarlar təşkilatları ilə hakimiyyət orqanları arasında sistemli dialoq müasir şəraitdə uğurlu sosial-iqtisadi inkişafın mühüm amili kimi" konfransında Milli Məclisin İqtisadi siyasət komitəsinin sədri Ziyad Səmədzadə bildirib.
"Bu rəqəmin daha yüksək olacağı da istisna deyil. Bu vəsait əsasən gələcək nəsillərin təminatı üçün Dövlət Neft Fonduna yönəldiləcək, bir hissəsi isə ölkədə özəl müəssisələrin inkişafına şərait yaradacaq infrastruktur layihələrin həyata keçirilməsində istifadə olunacaq", - Səmədzadə bildirib.
Mərkəzi Bankın sərəncamında olan valyuta ehtiyatları cari ilin 9 ayının yekunları üzrə 6943,3 milyon dollara çatıb.
Ölkənin strateji valyuta ehtiyatları Dövlət Neft Şirkətinin aktivlərindən, Mərkəzi Bankın ehtiyatlarından və hökumətin depozitlərindən formalaşır.