Azərbaycan, Bakı, 16 noyabr /Trend, müxbir A.Axundov/
Azərbaycanda dövlət büdcəsinin proqnozlaşdırılması əsasları ilə əlaqəli metodiki sənədin hazırlanması lazımdır. Trend-in məlumatına görə, bu barədə çərşənbə günü Hesablama Palatasının rəhbəri Heydər Əsədov parlamentin İqtisadi siyasət, Sosial siyasət, Təhlükəsizlik və müdafiə, Təbii ehtiyatlar, energetika və ekologiya, Aqrar siyasət komitələrinin 2012-ci il və sonrakı üç il üzrə dövlət və icmal büdcəsi layihəsinin müzakirələrində deyib.
"Dövlət büdcəsinin şəffaflığının və səmərəliliyinin artırılması üçün Azərbaycan Hesablama Palatası qrantlardan büdcə kəsirinin təmin edilməsi üçün istifadə praktikası əvəzinə, onlardan büdcənin gəlir mənbələri qismində istifadəni daha məqsədyönlü hesab edir", - Əsədov bildirib.
Onun sözlərinə görə, büdcəni daha şəffaf edən "digərləri" sütununda xərclərin payının azalmasına rəğmən, bu istiqamətdə daha genişmiqyaslı addımlar atılmalıdır.
"Büdcənin parametrləri ilə tanışlıq göstərir ki, "digər xərclər" bölməsindəki bəndlər geniş açılır, bu, şəffafdır, lakin onların təsnifatı baxımından ümumiləşdirilməsi daha çox səmərə verə bilər", - Əsədov deyib.
Həmçinin, onun sözlərinə görə, kommunal təsərrüfatın istifadəsi və xərclərinin planlaşdırılması mexanizminin təkmilləşdirilməsinə ehtiyac var.
"Ümumilikdə, büdcə "Büdcə sistemi haqqında" qanunun tələblərinə tam uyğun tərtib edilib. Biz onun Milli Məclisdə qəbulunu dəstəkləyirik", - Əsədov deyib.
